اۋىل اكىمدەرى سايلاۋىنىڭ ءوتۋ بارىسى تۋرالى

وكرۋگتىك سايلاۋ كوميسسيالارىنىڭ شەشىمىنە سايكەس، ەلىمىزدىڭ 14 وبلىسىنىڭ 176 اۋدانىنداعى (قالاسىنداعى) 730 وكرۋگ بويىنشا سايلاۋ جاريالاندى.

ساياسي پارتيالاردىڭ ىشىنەن ەڭ كوپ كانديداتتاردى Nur Otan پارتياسى ۇسىندى  دەپ حابارلايدى Almaty-akshamy.kz ايماقتىق سايلاۋ كوميسسيالارىنىڭ مالىمەتىنە سۇيەنىپ.

ناۋقان باستالعالى بەرى رەسپۋبليكادا 2322 كانديدات ۇسىنىلعان، ونىڭ ىشىندە 7 شىلدەدە - اۋىلدىق اكىمدىككە 102 كانديدات ۇسىنىلدى.

ولاردىڭ ىشىندە ءوزىن-وزى ۇسىنعان كانديداتتاردىڭ ەڭ كوپ سانى - 1 455 ادام (62،7%)، ساياسي پارتيالاردىڭ ۇسىنعانى – 867  ادام (37،3%).

ساياسي پارتيالاردىڭ ىشىنەن ەڭ كوپ كانديداتتاردى Nur Otan پارتياسى ۇسىندى - 588 ادام (67،8%)،

«اۋىل» - 100 ادام (11،5%)، قازاقستاننىڭ حالىق پارتياسى - 70 ادام (8،1%)، ADAL - 56 ادام (6،5%) AQJOL - 53 ادام (6،1%). ال، جسدپ ءبىر دە ءبىر كانديدات ۇسىنباپتى.

كانديداتتاردىڭ ەڭ كوپ بولىگى اقمولا (300)، قاراعاندى ​​(267)، الماتى (247) جانە شىعىس قازاقستان (237) وبلىستارىندا سايلاۋ جاريالانعان وكرۋگتەردىڭ كوپتىگىنە بايلانىستى ۇسىنىلدى. ال ەڭ از كانديدات ۇسىنعان ماڭعىستاۋ (36)، اتىراۋ (60) جانە باتىس قازاقستان (82) وبلىستارى.

ەلدەگى كانديداتتار اراسىنداعى باسەكە ءبىر ورىنعا 3،2 ادامنان كەلىپ تۇر. باسەكەسى ەڭ جوعارى ايماق - تۇركىستان (3،8)، ماڭعىستاۋ (3،6)، قاراعاندى ​​(3،6) جانە الماتى (3،5) وبلىستارى. ەڭ از باسەكە قوستاناي (2،3) جانە باتىس قازاقستان (2،6) وبلىستارىندا.

كانديداتتاردى ۇسىنۋ 9 شىلدەدە باستالدى، سونىمەن بىرگە كانديداتتاردى تىركەۋ قاتار جۇرۋدە (ۇمىتكەرلەردى تىركەۋ 14 شىلدەدەگى ساعات 18-00 دەيىن).