قارسىلاستار بۇعان دەيىن ينديان-ۋەللس تۋرنيرىندە كەزدەسكەن.
اۋستراليا اشىق چەمپيوناتىندا بۇگىن قازاقستاننىڭ ءبىرىنشى، الەمنىڭ 25-راكەتكاسى ەلەنا رىباكينا جارتىلاي فينالدا دۇنيەجۇزىلىك رەيتينگتە وزىنەن ءبىر ساتى جوعارى تۇرعان بەلارۋس وكىلى ۆيكتوريا ازارەنكومەن وينايدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۆ.ازارەنكو ە.رىباكينادان باقانداي ون جاسقا ۇلكەن، تاجىريبەسى دە مولىراق.
2012 جانە 2013 جىلدارى اۋستراليا اشىق چەمپيوناتىنىڭ جەڭىمپازى بولعان ۆ.ازارەنكو كەزىندە الەمنىڭ 1-راكەتكاسى اتاندى.
كەيىنگى جىلدارى ءسابيلى بولۋىنا جانە جاراقاتىنا بايلانىستى بۇرىنعى بيىگىنە كوتەرىلە قويعان جوق. الايدا بيىلعى اۋستراليا بىرىنشىلىگىندە شەبەر ويىن ورنەگىن كورسەتىپ كەلە جاتقان ۆيكتوريا تاعى ءبىر چەمپيوندىقتان ءۇمىتىن ۇزگەن جوق.
ال وتكەن جىلى ۋيمبلدون چەمپيونى اتانعان 23 جاستاعى ە.رىباكينا ناعىز دەر شاعىندا. سوندىقتان ماماندار الداعى ماچتا ەكەۋىنىڭ دە مۇمكىندىكتەرى تەڭ دەپ باعالاپ وتىر.
قارسىلاستار بۇعان دەيىن وتكەن جىلى ينديان-ۋەللس (اقش) تۋرنيرىندە كەزدەسىپ، وندا ە.رىباكينا 6:3، 6:4 ەسەبىمەن ۇتقان ەدى. ساعات جارىمنان استام ۋاقىتقا سوزىلعان باسەكە بارىسىندا قازاقستاندىق تەننيسشى 5 ەيس جاساپ، 8 برەيك-پوينتتىڭ ەكەۋىن پايدالانعان. ۆ.ازارەنكو 3 ەيس جاساعانىمەن، بىردە-بىر برەيككە قول جەتكىزە الماعان ەدى.
بۇل جولى ويىن قالاي ءوربيدى، ونى الداعى ماچ كورسەتەدى.
جارتىلاي فينالدىق باسەكە استانا ۋاقىتىمەن ساعات 14.30-دا باستالادى.
ەسكە سالا كەتەيىك، بۇدان بۇرىن اۋستراليا چەمپيوناتىندا ەلەنا رىباكينانىڭ العاش رەت جارتىلاي فينالعا شىققانىن جازعان بولاتىنبىز.
سونداي-اق ەلەنا رىباكينانىڭ جارتىلاي فينالداعى قارسىلاسى انىقتالدى.
قازاقستاندىق تەننيسشىلەر حالىقارالىق تۋرنيرلەردى جەڭىسپەن باستادى.
اۋستراليا چەمپيوناتىندا جارتىلاي فينالعا شىققان تەننيسشىلەر انىقتالدى.