2024 جىلى ەلىمىزدە 29 ءىرى زاۋىت سالىندى. بۇل تۋرالى ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ باياندادى، دەپ حابارلايدى aqshamnews.kz
مىسالى، قوستاناي وبلىسىندا شويىن قۇيۋ، الماتى وبلىسىندا ۆولفرام جانە جىلۋ وقشاۋلاعىش ماتەريالدار، شىمكەنتتە باعالى مەتالداردى وڭدەۋ، قاراعاندى وبلىسىندا كاتودتى مىس، اۆتوموبيل شينالارى مەن تۇرمىستىق تەحنيكا شىعاراتىن ونەركاسىپتىك نىساندار سالىندى. ساران قالاسىندا زاماناۋي وندىرىستەردىڭ ىسكە قوسىلۋى ونىڭ مونوقالالار ساناتىنان شىعۋىنا مۇمكىندىك بەردى.
سونداي-اق العاش رەت ەلىمىزدە 19 ملن شارشى مەتر تۇرعىن ءۇي سالىندى. 397 دەنساۋلىق ساقتاۋ نىسانى، 298 ءبىلىم بەرۋ نىسانى بوي كوتەردى. 11 مىڭ ورىنعا ارنالعان 40 ستۋدەنتتىك جاتاقحانا پايدالانۋعا بەرىلدى. 12 مىڭ شاقىرىم اۆتوموبيل جولدارى جانە 2،8 مىڭ شاقىرىم تەمىرجول جوندەلدى. الماتى، قىزىلوردا جانە شىمكەنت اۋەجايلارىندا 3 جاڭا تەرمينال پايدالانۋعا بەرىلدى.
قوسىمشا 300 مىڭنان استام ادام گازبەن قامتىلىپ، 200 مىڭنان استام ادام ورتالىق سۋ جۇيەسىنە قوسىلدى. 542 شاقىرىم جىلۋ جەلىلەرى مەن 55 جىلۋ كوزى جاڭعىرتىلىپ، 6،5 مىڭ شاقىرىم ينجەنەرلىك جەلىلەر جوندەلدى. جالپى قۋاتى 700 مۆت-تان اساتىن قوسىمشا ەلەكتر قۋاتىن ءوندىرۋ كوزدەرى ىسكە قوسىلدى.