زاڭ جوباسىن ەكىنشى وقىلىمعا دايىنداۋ بارىسىندا دەپۋتاتتار ءبىرقاتار تۇزەتۋ ەنگىزدى، دەپ حابارلايدى aqshamnews.kz
اتاپ ايتقاندا، اۋماقتىق قورعانىستىڭ ماقساتى مەن مىندەتتەرى، ۇكىمەتتىڭ، وسى سالاداعى ۋاكىلەتتى ورگاننىڭ، ورتالىق جانە جەرگىلىكتى مەملەكەتتىك ورگانداردىڭ، سونداي-اق قازاقستان رەسپۋبليكاسى پرەزيدەنتىنە باعىناتىن جانە ەسەپ بەرەتىن مەملەكەتتىك ورگانداردىڭ قۇزىرەتتەرى ناقتىلاندى. سونىمەن قاتار ءماجىلىس دەپۋتاتتارى زاڭدى ەكى جاڭا باپپەن تولىقتىرۋدى ۇسىندى.
بۇل باپتاردا اۋماقتىق قورعانىس ءىس-شارالارى بەكىتىلىپ، اۋماقتىق قورعانىس جوسپارىن ازىرلەۋ جانە بەكىتۋ ءتارتىبى ايقىندالادى. مەملەكەتتىڭ قورعانىس جوسپارىنىڭ قۇرامداس بولىگى بولا وتىرىپ، بۇل جوسپار اۋماقتىق قورعانىستى جۇزەگە اسىرۋداعى نەگىزگى قۇجاتقا اينالماق. بۇدان بولەك گلوسسارييگە «اۋماقتىق قورعانىس نىسانى» ۇعىمى ەنگىزىلدى. مۇنداي نىسانداردىڭ تىزبەسىن بەكىتۋ قۇزىرەتى ۇكىمەت پەن جەرگىلىكتى اتقارۋشى ورگاندارعا جۇكتەلەدى.
بۇل ءتىزىمنىڭ الدىن الا بەكىتىلۋى اۋماقتىق قورعانىس جوسپارىندا اسكەري جانە مەملەكەتتىك ماڭىزى بار نىسانداردى كۇزەتۋگە تارتىلاتىن كۇشتەر مەن قۇرالداردى ناقتى بەلگىلەۋ ءۇشىن قاجەت. اۋماقتىق قورعانىستى جوسپارلاۋعا قۇقىق قورعاۋ ورگاندارى دا قاتىسادى. ولار وزدەرىنە تيەسىلى اۋماقتىق قورعانىس نىساندارىن كۇزەتۋ جانە قورعاۋ مىندەتتەرىن اتقارادى.
سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى جۇرگىزۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ تۇجىرىمداماسىنا سايكەستەندىرۋ ماقساتىمەن اۋماقتىق قورعانىس سالاسىندا مەملەكەتتىك باقىلاۋ جۇرگىزۋ ءتارتىبى دە بەلگىلەنەتىن بولادى.