10 قىركۇيەكتە ساعات 10:00-دە قوستاناي وبلىسىنىڭ اۋليەكول اۋدانىنداعى ورمان ءورتى تولىقتاي ءسوندىرىلدى، 7 قىركۇيەكتە ساعات 15:00-دە ءورت اۋىزدىقتالعان بولاتىن، دەپ حابارلايدى Almaty-akshamy.kz Inform.kz-كە سىلتەمە جاساپ.
ەسكە سالا كەتەيىك، 2 قىركۇيەكتە ساعات 15:10-دا اۋليەكول اۋدانىنىڭ باسامان جانە سەميوزەر ورمان شارۋاشىلىعى باسقارمالارىنىڭ اۋماقتارىندا اعاشتار مەن قۇرعاق شوپتەر ورتەنگەن بولاتىن.
ءورت اۋماعى 43 مىڭ گەكتاردى قۇرادى. ەكى ەلدى مەكەندەگى 91 تۇرعىن ءۇي جانىپ كەتتى.
ەۆاكۋاسيالانعاندار ۇيلەرىنە ورالدى، قالعاندارى تۋىستارىندا قالدى. ءورت باستالعاننان بەرى بارلىعى 2 091 ادام ەۆاكۋاسيالان بولاتىن.
12 ادام ءورت كەزىندە جەڭىل جانە ورتاشا اۋىرلىقتاعى جاراقاتتار، كۇيىكتەر الىپ، ۋلاندى. بۇگىندە زارداپ شەككەن 3 ادام اۋليەكول اۋداندىق اۋرۋحانادا ەم قابىلداپ جاتىر.
1935 جىلى تۋعان ءبىر ادام قازا تاپتى.
جەدەل شتاب جۇمىسى باستالعاننان بەرى تجم جەدەل جەلىسىنە 38 قوڭىراۋ كەلىپ ءتۇستى. 87 ازاماتقا كونسۋلتاسيالىق-پسيحولوگيالىق كومەك كورسەتىلدى، 45 بالامەن توپتىق پسيحولوگيالىق جۇمىس جۇرگىزىلدى.
تىكۇشاقتار اۋەدەن 327 رەت سۋ شاشتى.
ءورتتى سوندىرۋگە 1 785 ادام جانە 207 بىرلىك تەحنيكادان قۇرىلعان كۇشتەر جانە قۇرالدار جۇمىلدىرىلدى.
وقيعا ورنىندا باسامان جانە سەميوزەر ورمان شارۋاشىلىعى باسقارماسى 73 ادام جانە 21 بىرلىك تەحنيكادان قۇرىلعان كۇشتەرى مەن قۇرالدارى قالىپ وتىر.
جەدەل شتاب ءوز جۇمىسىن اياقتادى.