الماتىنىڭ ينتەرناسيوناليست جاۋىنگەرلەرى كەڭەس اسكەرلەرىنىڭ اۋعانستاننان شىعارىلعانىنا 35 جىل تولۋىنا وراي ارنايى تولەمدەر الادى. الماتىدا 15 اقپانعا دەيىن اۋعان ارداگەرلەرىنە 100 مىڭ تەڭگە كولەمىندە ءبىرجولعى ماتەريالدىق كومەك كورسەتىلەدى.
بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا اۋعانستانداعى سوعىس ارداگەرلەرى مەن مۇگەدەكتەرىن ۇيلەستىرۋ كەڭەسىنىڭ ءتوراعاسى مۇرات ابدىشۇكىروۆ ايتىپ بەردى، دەپ حابارلايدى Almaty-akshamy.kz
الماتىدا ءقازىر اۋعان سوعىسىنىڭ 2389 ارداگەرى تۇرادى، ولاردىڭ 1100ء-ى مۇگەدەك.
«الماتى اكىمدىگى ارداگەرلەردى قولدايدى جانە 15 اقپان قارساڭىندا جانە 9 مامىرعا قاراي ينتەرناسيوناليست جاۋىنگەرلەر 100 مىڭ تەڭگەدەن الادى»، - دەدى م.ابدىشۇكىروۆ.
ول اۋعان سوعىسىنىڭ ارداگەرلەرى مەديسينالىق كورسەتكىشتەرى بويىنشا ساناتوريي-كۋرورتتىق ەم الا الاتىنىن ايتتى. ءقازىر كۆوتا جىلىنا 170 جولداماعا دەيىن ۇلعايتىلدى.
ەستەرىڭىزگە سالا كەتەيىك، 2024 جىلى كەڭەس اسكەرلەرىنىڭ اۋعانستاننان شىعارىلعانىنا 35 جىل تولادى. وسىعان وراي، 2024 جىلعى 15 اقپاندا ساعات 11:00-دە 28 گۆاردياشى-پانفيلوۆشىلار ساياباعىندا اۋعانستاندا قازا تاپقان الماتىلىقتارعا ماڭگىلىك الاۋ مەن ەسكەرتكىشكە گۇل شوقتارىن قويۋ ءراسىمىن وتكىزەدى.