اۋە رەيستەرىن كەشىكتىرگەن كومپانيالارعا 25 ملن تەڭگە ايىپپۇل سالىندى

2،9 مىڭ رەيس كوممەرسيالىق جاعدايعا قاتىستى توقتاعان

2022 جىلى 78،4 مىڭ اۋە رەيسىنىڭ ىشىنەن 5 مىڭنان استامى توقتاتىلعان. بۇل تۋرالى سەناتتا اۋە كولىگى ماسەلەسىن تالقىلاۋ كەزىندە ق ر يندۋستريا جانە ينفراقۇرىلىمدىق دامۋ ۆيسە-مينيسترى الماز ىدىرىسوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

وسى ورايدا ول 2،1 مىڭ رەيس وپەراسيالىق سەبەپتەر بويىنشا، 2،9 مىڭى كوممەرسيالىق جاعدايعا قاتىستى توقتاعانىن ايتتى.

ۆيسە-مينيستردىڭ سوزىنە قاراعاندا، بىلتىر اۋە رەيستەرىنىڭ تۇراقتىلىعى 74 پايىزدى قۇراسا، 2021 جىلى بۇل كورسەتكىش 82 پايىز بولعان. 2022 جىلى رەيستەردىڭ كەشىگۋىنىڭ نەگىزگى سەبەپتەرى رەتىندە تەحنيكالىق جاعداي (13%)، جولاۋشىلارعا قىزمەت كورسەتۋ، باگاج جانە جۇكتى ۇزاق ءتۇسىرۋ (16%)، كليماتتىق جاعدايلار (8%)، ادامي فاكتورى – ەكيپاجدىڭ جەتىسپەۋى، شەكارا ءارى كەدەندىك باقىلاۋ جانە باسقا دا وقيعالار اسەر ەتكەن.

«اۋە كولىگىمەن تاسىمالداۋشىنىڭ كىناسى دالەلدەنسە، ءبىز اكىمشىلىك جاۋاپكەرشىلىككە تارتامىز. 2022-2023 جىلدارى جالپى سوماسى 8200 اەك-تى (25،2 ملن تەڭگە) قۇرايتىن 9 اكىمشىلىك ايىپپۇل سالىندى»، - دەدى ءمينيستردىڭ ورىنباسارى.