ساباقتى تاجىريبەسى مول، بىلىكتى ماماندار جۇرگىزەدى.
جەتىگەن گارنيزونىندا ەلىمىزدىڭ اۋە قورعانىسى كۇشتەرى، ۇلتتىق قاۋىپسىزدىك كوميتەتى جانە ۇلتتىق ۇلان اسكەري بولىمدەرىنىڭ سەرجانتتار قۇرامى كۋرستىق دايارلىقتان ءوتىپ جاتىر، دەپ حابارلايدى Almaty-akshamy.kz.
«كۋرستىق دايارلىق اۋە قورعانىسى كۇشتەرىنىڭ كىشى ماماندارىن دايارلايتىن بىرەگەي وقۋ-جاتتىعۋ ورتالىعىندا ۇيىمداستىرىلىپ وتىر. بۇل جەردە كەلىسىمشارت بويىنشا اسكەري قىزمەتشىلەردى ينجەنەرلىك-اۆياسيالىق قىزمەت، ۇشۋدى قامتاماسىز ەتۋ قۇرالدارىن پايدالانۋ جانە جوندەۋ، بايلانىس جانە راديوتەحنيكا ماماندىقتارىنا وقىتادى»،- دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
كۋرستىق دايارلىقتىڭ ماقساتى – اسكەري قىزمەتشىلەردىڭ كاسىبي دەڭگەيىن ارتتىرىپ، پراكتيكالىق داعدىلارىن جەتىلدىرۋ جانە دەنە دايارلىعىن جاقسارتۋ.
«وقۋ پروسەسى اسكەري-اۋە كۇشتەرى مەن اۋە شابۋىلىنا قارسى قورعانىس اسكەرلەرىنىڭ كىشى ماماندارىن دايارلايتىن ەكى مەكتەپتە 15 ماماندىق بويىنشا وتكىزىلەدى. وقۋ ۇزاقتىعى ءبىر جارىم اي»، – دەيدى قىزمەت باستىعى – وقۋ-ادىستەمەلىك ءبولىمنىڭ وقىتۋشىسى پودپولكوۆنيك سامعات كۇشقالييەۆ.
وقۋ-جاتتىعۋ ورتالىعىندا جاتتىقتىرۋ كەشەندەرى، زەرتحانالىق-وقۋ سىنىپتارى، اۋە شابۋىلىنا قارسى قورعانىس اسكەرلەرىنىڭ ۇشۋ اپپاراتتارى مەن تەحنيكالارىنىڭ مودەلدەرى بار. ماماندىعى بويىنشا پراكتيكالىق داعدىلاردى پىسىقتاۋعا مۇمكىندىك بەرەتىن ءتيىستى ماتەريالدىق-تەحنيكالىق بازامەن جابدىقتالعان.
ساباقتى تاجىريبەسى مول، بىلىكتى ماماندار جۇرگىزەدى. وسى جىلدار ىشىندە ورتالىق ءۇش مىڭنان استام كىشى بۋىن ماماندارىن دايارلاپ شىعاردى.