اۋداننىڭ ءۇش قوعامدىق وبەكتىسى اباتتاندىرىلادى

بيىلعى ءى جارتىجىلدىقتا بۇل جوبالار بويىنشا جوبالاۋ-سمەتالىق قۇجاتتاما ازىرلەنەدى.

تۇرعىنداردىڭ جايلى ءومىرى ءۇشىن قوعامدىق كەڭىستىكتىڭ ءۇش وبەكتىسىن اباتتاندىرۋ جوسپارلانعان، دەپ حابارلايدى Almaty-akshamy.kz

جاڭا جوبالار - ءال-فارابي داڭعىلىنان اباي داڭعىلىنا دەيىنگى ۇزىندىعى 7،1 كم ۇلكەن الماتى وزەنىنىڭ جاعالاۋى، بۇرىنعى رەزيدەنسيا ورنىنداعى پارك جانە تۇڭعىش پرەزيدەنت ساياباعىن رەكونسترۋكسيالاۋ.

وسى جىلدىڭ ءى جارتىجىلدىعىندا بۇل جوبالار بويىنشا جوبالاۋ-سمەتالىق قۇجاتتاما ازىرلەنەدى. قۇرىلىس-مونتاجداۋ جۇمىستارىن بيىل III توقساندا باستاپ، 2024 جىلدىڭ III توقسانىندا اياقتاۋ جوسپارلانعان.

وتكەن جىلى بوستاندىق اۋدانىندا 16 ۋچاسكەدە تۇراقتى سۋ باساتىن ورىندار بولعان. توتەنشە جاعداي جەلىسى بويىنشا بۇل ماسەلەنى جەدەل شەشۋ ءۇشىن 2022 جىلعى جەلتوقساندا سۋ باسۋعا نەعۇرلىم بەيىم 6 ۋچاسكەدە جۇمىستار باستالدى.

بۇگىنگى كۇنى 913 م ارىق جەلىسىن رەكونسترۋكسيالاۋ جانە سالۋ ەسەبىنەن 5 ۋچاسكە جويىلدى. بيىل ناۋرىز ايىنىڭ سوڭىنا دەيىن تيميريازيەۆ پەن ايمانوۆ كوشەلەرىنىڭ قيىلىسىنداعى تاعى 1 ۋچاسكەنى جويامىز. قالعان 10 ۋچاسكە 2023 جىلدىڭ سوڭىنا دەيىن جويىلادى.