اتىراۋ وبلىسى، يندەر اۋدانىنا قاراستى ساكەن سەيفۋللين اتىنداعى ورتا مەكتەبىنىڭ 8-سىنىپ وقۋشىسى قاجىمۇقان مۇقاتوۆ سۋدى جانە مينەرالدى تىڭايتقىشتاردى ۇنەمدەۋگە مۇمكىندىك بەرەتىن تامشىلاتا سۋارۋ قوندىرعىسىن ويلاپ تاپقان، دەپ حابارلايدى almaty-akshamy.kz
«باستى نازارىمدى تىڭايتقىشتاردى ۇنەمدەي وتىرىپ، سۋدىڭ وسىمدىك تامىرىنا بارۋىنا اۋداردىم. ويىم جۇزەگە اسسا، ونىمدىلىكتى ارتتىراتىنىمدى ءتۇسىندىم. تامشىلاپ سۋارۋ ءادىسىنىڭ ارتىقشىلىعىن الەم ەلدەرى جاقسى بىلەدى. وسىنداي تەحنولوگيانىڭ قازاقستاندا دا دامىعانىن قالايمىن. اتىراۋ ءوڭىرىنىڭ تۋماسى بولعاندىقتان، جايىق وزەنىنىڭ تارتىلىپ بارا جاتقانىن جاقسى بىلەمىن. وسى قوندىرعىنى پايدالانىپ، وزەن اڭعارىنىڭ ەكوجۇيەسىن ساقتاپ قالعىم كەلەدى»،– دەدى 8-سىنىپ وقۋشىسى «ادىرنا» پورتالىنا بەرگەن سۇحباتىندا.
اڭگىمە بارىسىندا دارىندى وقۋشى قوندىرعىنى ىسكە اسىرۋعا ءمۇعالىمىنىڭ كومەتەسكەنىن ايتتى. ۇستازىنىڭ ەسىمى – وتەپقالي ءناسىپقالي. «وسى كىسى يدەيامدى جۇزەگە اسىرۋعا كومەكتەسىپ، باعىت-باعدار بەردى. وسىلايشا، قوندىرعىنى ويلاپ تاپتىق»، - دەيدى قاجىمۇقان مۇقاتوۆ.
قاجىمۇقان يندەر اۋداندىق ءبىلىم ءبولىمىنىڭ وقۋشىلار شىعارماشىلىق ورتالىعىنداعى «شەبەر» ۇيىرمەسىنە 2017-2018 وقۋ جىلىنان باستاپ قاتىسادى ەكەن. ۇيىرمە جەتەكشىسىنىڭ ايتۋىنشا، قاجىمۇقان – وتە سابىرلى، اڭعارىمپاز بالا. ونىڭ ارمانى – جەكە كاسىپكەر بولىپ، مۇمكىندىگى شەكتەۋلى بالالارعا كومەكتەسۋ.