الماتىدا جوق پاتەرلەردى جالعا بەرۋمەن اينالىسقان ەكى الاياق ۇستالدى

جالعان پاتەر تاپسىرىپ كەلگەندەر ءىسى اشكەرەلەندى

پاۆلودار قالاسىنىڭ تۇرعىندارى 24 جاستاعى ب. ەسىمدى قىز بەن 27 جاستاعى س.ەسىمدى ايەل الماتىدا جوق پاتەرلەردى جالعا بەرىپ كەلگەن، دەپ حابارلايدى Almaty-akshamy.kz.

Polisia.kz حابارلاۋىنشا، الاياقتار وزدەرىنىڭ قۇيتىرقى ارەكەتتەرىن ىسكە اسىرۋ ءۇشىن ينتەرنەتتە پاتەردى جالعا بەرۋ تۋرالى جالعان حابارلاندىرۋ جاريالاعان. 

 «ولار جالداۋ اقىسىن تومەن قىلىپ، باسقا ادامداردىڭ جارناماسىنان سۋرەتتەردى قويعان. كليەنتتەرمەن كەلىسسوزدەر تەك تەلەفون ارقىلى جۇرگىزىلدى، ولار وزدەرىنىڭ نيەتتەرىنىڭ تازالىعىنا سەندىرىپ، الدىن الا تولەمدى بالانسقا اۋدارۋدى ۇسىنعان. زارداپ شەككەندەر اقشا جىبەرگەن كەزدە ايەلدەر بىردەن جارنامانى الىپ تاستاپ، ۇيالى تەلەفوندارىن ءوشىرىپ وتىرعان»، – دەيدى الماتى قالالىق پد قريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

وسى ىسكە قاتىستى ق ر قك-نىڭ 190-بابى (الاياقتىق) بويىنشا سوتقا دەيىنگى تەرگەۋ جۇرگىزىلۋدە. قازىرگى ۋاقىتتا بىرنەشە زارداپ شەككەندەر انىقتالدى. الايدا ولاردىڭ سانى الدەقايدا كوپ بولۋى مۇمكىن. كۇدىكتىلەردىڭ ەكەۋى دە بۇرىن ءىستى بولعان.