اتىراۋدا مىڭنان استام اسىل تۇقىمدى ەدىلباي قويى تىرىدەي جانىپ كەتتى

ءقازىر شارۋاشىلىققا كەلگەن شىعىن ەسەپتەلىپ جاتىر

اتىراۋدا جەكە شارۋاشىلىققا تيەسىلى مىڭنان استام "ەدىلباي" تۇقىمدى قوي تىرىدەي جانىپ كەتتى، دەپ حابارلايدى Almaty-akshamy.kz astanatv-عا سىلتەمە جاساپ.

وقيعا قۇرمانعازى اۋدانىنىڭ سۇيىندىك اۋىلدىق وكرۋگىنە قاراستى جالعىزاپان اۋىلى ماڭىندا بولعان. رەسمي دەرەك بويىنشا، 47 گەكتار جەر وتقا ورانعان. اۋىل تۇرعىندارىنىڭ ايتۋىنشا، ءتىلسىز جاۋ رەسەي فەدەراسياسى استراحان وبلىسىنىڭ اۋماعىندا تۇتانعان. كەيىن اتىراۋ وبلىسىنا جايىلعان. سەرىكتەستىك ءتىرى قالعان قويدى سويىپ الىپ ۇلگەرىپتى.

«ءتىرى قالعان 199 باس قوي سويىپ الىندى. 304 باس قوي اتىراۋ قالاسىنا اۆتوكولىكپەن جەتكىزىلدى. شىعىن كولەمى 500 باس قوي. سەرىكتەستىك تاراپىنان مال باسى شىعىنى جونىندە قۇزىرلى ورگاندارعا ارىز-شاعىم تۇسكەن جوق»، - دەيدى قۇرمانعازى اۋدانى اكىمىنىڭ ورىنباسارى نۇرلىبەك قالييەۆ.

جەرگىلىكتى توتەنشە جاعدايلار ءبولىمىنىڭ مالىمەتىنشە، ءورتتى سوندىرۋگە 30 قۇتقارۋشى مەن 4 تەحنيكا جۇمىلدىرىلعان. جالعىزاپان جانە سۇيىندىك اۋىلىنىڭ ەرىكتى تۇرعىندارى جالىندى اۋىزدىقتاۋعا اتسالىسقان.

ابىروي بولعاندا، ادام امان. ءقازىر شارۋاشىلىققا كەلگەن شىعىن ەسەپتەلىپ جاتىر.