قوجايىن كولىك ەسىگىن قۇلىپتاماعان
اتىراۋدا بوتەننىڭ كولىگىن ۇرلاپ، ايداپ كەتكەن 24 جاستاعى جىگىت ۇستالدى، دەپ حابارلايدى Almaty-akshamy.kz وبلىستىق پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
پوليسيا دەپارتامەنتى ۇسىنعان دەرەكتەرگە قاراعاندا، كولىك 4 قاراشادا اتىراۋ قالاسىندا ۇرلانعان.
«بۇل تۋرالى ساعات 12:22 شاماسىندا «تoyota Highlander» ماركالى كولىكتىڭ يەسى – 28 جاستاعى ازاماتشادان 102 وپەراتورى ارقىلى شاعىم ءتۇستى. ول سول كۇنى ساعات 11:20 شاماسىندا ب.مومىش ۇلى كوشەسىندە ورنالاسقان ەمحانانىڭ الدىنا قارا ءتۇستى «Toyota Highlander» ماركالى اۆتوكولىگىن قالدىرعان. ءبىراق، كەيىن ەمحانادان شىققان كەزدە كولىگىن تابا الماي قالعان»، - دەلىنگەن حابارلامادا.
شاعىمدانۋشىنىڭ حابارىنان كەيىن جەدەل باسقارۋ ورتالىعى مەن پاترۋلدىك پوليسيا قىزمەتكەرلەرى جەدەل ىزدەستىرۋگە كىرىستى.
«جەدەل باسقارۋ ورتالىعىنىڭ قىزمەتكەرلەرى «سەرگەك» جۇيەسىنىڭ بەينەباقىلاۋ كامەرالارى ارقىلى ۇرلانعان اۆتوكولىكتىڭ ءجۇرۋ باعىتى انىقتادى. ال، پوليسيا قىزمەتكەرلەرى كولىكتى ش.ءۋاليحانوۆ كوشەسىنىڭ بويىندا توقتاتىپ، ونى زاڭسىز جۇرگىزىپ كەتكەن 24 جاستاعى ەر ادامدى ۇستادى»، -دەپ حابارلادى دەپارتامەنتتىڭ باسپا ءسوز قىزمەتى.
كەيىن بەلگىلى بولعانداي، يەسى كولىكتىڭ كىلتىن وتالدىرۋ تەتىگىندە قالدىرىپ، ەسىگىن قۇلىپتاماعان. ءقازىر بوتەننىڭ كولىگىن ۇرلاپ، ايداپ كەتكەن كۇدىكتىگە قاتىستى ق ر قىلمىستىق كودەكسىنىڭ 200-بابىنىڭ 1-بولىگىمەن (اۆتوكولىكتى زاڭسىز ايداپ كەتۋ) قىلمىستىق ءىس قوزعالدى. سوتقا دەيىنگى تەرگەۋ باستالدى.