سوت وتىرىسى ءوتىپ جاتىر
اتىراۋدا وبلىس اكىمىنىڭ بۇرىنعى ورىنباسارى باقىتگۇل حامەنوۆاعا قاتىستى سوت قايتا جالعاستى. ونىمەن بىرگە وبلىستىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقالييەۆ پەن «بالقىتۋ» ءجشس-نىڭ ديرەكتورى ءومىرتاي اداموۆ كۇدىككە ىلىنگەن، دەپ حابارلايدى Almaty-akshamy.kz قازاقپارات-قا سىلتەمە جاساپ.
سوت وتىرىسى اتىراۋداعى №2 قالالىق سوتتا ءوتىپ جاتىر. باقىتگۇل حامەنوۆا مەن اقىلبەك رىسقالييەۆتىڭ ءىسى ق ر قىلمىستىق كودەكسىنىڭ 366-بابى 3-بولىگىنىڭ 3-تارماعىمەن تەرگەلگەن. ال «بالقىتۋ» ج ش س ديرەكتورى ءومىرتاي اداموۆ ق ر قىلمىستىق كودەكسىنىڭ 367-بابى 2-بولىگىمەن تەرگەۋگە الىنعان.
اتىراۋ وبلىسى اكىمىنىڭ ورىنباسارى قىزمەتىن اتقارعان باقىتگۇل حامەنوۆا اباي ەسكەرتكىشىن ورناتۋعا بولىنگەن قاراجاتتان پارا الدى دەپ ايىپتالىپ وتىر.
بۇگىنگى سوت وتىرىسىندا «اسىل ولكە» قوعامدىق بىرلەستىگىنىڭ ءتوراعاسى ورىنشا ماكەيەۆا كۋاگەر رەتىندە جاۋاپ بەردى.
ونىڭ ايتۋىنشا، «ۇلى ۇلىس – التىن وردا» رەسپۋبليكالىق كونفەرەنسياسىن وتكىزەر الدىندا ونى ب.حامەنوۆا شاقىرىپ، ءىس-شارانى وتكىزۋگە دەمەۋشىلەر ارقىلى قاراجات تابۋدى تاپسىرعان.
«ماعان 231 490 511 تەڭگە كولەمىندە قاراجات تابۋ كەرەك بولدى. مەن دەمەۋشى ىزدەدىم. بۇل سوما ءىس-شارادا قىزمەت كورسەتەتىن «كەرىم مەديا» كومپانياسىنا قاجەت ەدى. بۇل تۋرالى باقىتگۇل حامەنوۆا دا، اقىلبەك رىسقالييەۆ تە ءبىلدى. بۇل ءبىزدىڭ ارامىزدا قۇپيا بولعان جوق. ويتكەنى، بۇل تۋرالى وبلىس باسشىلىعىنا دا بەلگىلى بولدى»، - دەدى ورىنشا ماكەيەۆا.
بۇدان بۇرىن سوتتا باقىتگۇل حامەنوۆا وزىنە تاعىلعان ايىپپەن كەلىسپەيتىنىن ءمالىم ەتكەن ەدى. ونىڭ ىسىنە قاتىستى ايىپتاۋ اكتىسى 55 بەتتى قۇراعان.