اتىراۋدا اجىراسقان ەر ادام باسپاناسىن بولىسكىسى كەلمەي ءۇيىن ءسۇرىپ تاستادى

ىرگەتاسى قالانعانىنا ون جىل دا بولماعان ۇلكەن ءۇيدىڭ ءقازىر تاس-تالقانى شىققان

سەگىز جىل وتاسقان ەرلى-زايىپتىلار ءدام-تۇزى جاراسپاي اجىراسقان. سوت مۇلىكتەرىن تەڭدەي ءبولىپ بەرگەن، دەپ حابارلايدى Almaty-akshamy.kz.

اتىراۋلىق اينۇر قاناتوۆا بالالارىمەن تۋىستارىنىڭ ءۇيىن پانالاپ ءجۇر. وتكەن جىلى جولداسىمەن زاڭ جۇزىندە اجىراسىپ، سوت مۇلىكتەرىن تەڭدەي ءبولىپ بەرگەن. ءبىراق كۇيەۋى سوتتىڭ شەشىمىنە قاراماي، بالالارىنا دا قيماي، جىلدار بويى  قابىرعاسىن بىرگە قالاعان باسپاناسىن تراكتورمەن كۇرەپ تاستاپتى. ىرگەتاسى قالانعانىنا ون جىل دا بولماعان ۇلكەن ءۇيدىڭ ءقازىر تاس-تالقانى شىققان. ءتىپتى اۋلاداعى شاعىن ءۇي مەن گاراجدى دا قيراتىپ تاستاعان. وكىنىشتەن وكسىپ جىلاعان كەلىنشەك بۇل جاعداي وتكەن جىلى بولعانىن، بۇزىپ باستاعاندا پوليسياعا دا حابارلاعانىن ايتادى. كۇيەۋى سوتتىڭ شەشىمى شىعىسىمەن ءۇيدى بۇزۋعا  جۇمىسشىلار جالداعان. ءسۇرىپ تاستاماس بۇرىن ءۇيدىڭ شاتىرى مەن ەسىك-تەرەزەسىن شەشىپ الىپتى، دەلىنگەن كتك تەلەارناسىنىڭ سيۋجەتىندە.

«ءۇيدى بۇزىپ جاتقانىمىزعا ءتورت كۇن بولدى دەيدى. ماسقارا عوي. 14ء-ى كۇنى سوتتىڭ شەشىمى شىعادى. سوت شەشىمىنە دە، ەشنارسەگە قارامايدى. بۇل نە قىلعان باسسىزدىق! اتىراۋدا، اتىراۋ وبلىسىندا زاڭ بار ما؟ مەن ءقازىر كىشكەنتاي بالالارىممەن تۋىسقاندارىمنىڭ ءۇيىن پانالاپ جۇرگەنىمە جىل جارىم بولدى»،-دەيدى اينۇر قاناتوۆا.

38 جاستاعى كەلىنشەكتىڭ ايتۋىنشا، وسىدان سەگىز جىل بۇرىن ءبىر بالاسىمەن وزىنەن 18 جاس ۇلكەن ازاماتقا تۇرمىسقا شىققان. ول كۇيەۋىنەن ءقازىر ەكى ۇلى بار. وتباسىلىق ايقاي-شۋ ۇلكەن ۇلىن جاقتىرماۋدان باستالىپتى. اتا-اناسى ءتىرى كەزدە ۇلى سولاردىڭ قولىندا بولعان. كەيىن اناسى قايتىس بولىپ، ءوز قولىنا العان. كۇيەۋى ۇلىن باۋىرىنا باسپاق تۇگىلى، بوقتاپ-بالاعاتتاپ، قىسىم كورسەتىپتى. ءتىپتى بۇرىن پوليسيادا قىزمەت اتقارعان قايىن ءىنىسى وزىنە كۇش كورسەتكەندە ۇيدەن كەتۋگە ءماجبۇر بولعان.

«قورىققاننان ءماجبۇر بولدىم. كەتتىم، ءۇش بالامەن. شارباققا قاينىم كەلدى. بۇرىن ىشكى ىستەر قىزمەتكەرى بولعان. پوليسيادا ىستەگەن. شارباقتىڭ ىشىندە مەنى جەرگە قۇلاتىپ، كەۋدەمنەن تىزەسىمەن باسىپ الدى. ۇلكەن ۇلىمنىڭ تەلەفونىن تارتىپ العان. سەبەبى تەلەفوندا بالامدى بالاعاتتاعان، اۋىر سوزدەر ايتقان جازبالار بار ەدى. سونى قۇرتۋ كەرەك بولدى»،-دەيدى اينۇر قاناتوۆا.

ءۇيىن كۇرەپ تاستاعان ازاماتتى دا تىڭداپ كورمەكشى بولىپ حابارلاسقان ەدىك، الايدا ول جاۋاپ بەرۋدەن باس  تارتتى. ال ونىڭ بۇل  ارەكەتىن ءقازىر ءتارتىپ ساقشىلارى تەكسەرىپ جاتىر.

«ق ر قك 389-بابىنىڭ 1-بولىگىمەن وزىنشە بيلىك فاكتىسىمەن سوتقا دەيىن تەرگەپ-تەكسەرۋ جۇرگىزىلۋدە.  تەرگەپتەكسەرۋ 2022 جىلدىڭ 19 ساۋىرىندە باستالدى. ءقازىر قىلمىستىق ءىس تەرگەۋ ساتىسىندا»،-دەدى اتىراۋ وبلىسى پد انىقتاۋ باسقارماسىنىڭ اعا انىقتاۋشىسى ەلدوس تۇقپاتوۆ.

ءقازىر اينۇر ەكى ۇلىمەن اۋلاعا دا كىرە المايدى.  قيراعان شاڭىراقتارىن قاقپانىڭ سىرتىنان قاراپ ءجۇر. ول قۇزىرلى ورگاندار ءادىل تەرگەۋ جۇرگىزىپ، انا مەن بالا قۇقىعىن قورعاسا ەكەن دەپ تىلەيدى.