ق ر اشم جايىق-كاسپيي وبلىسارالىق باسسەيندىك بالىق شارۋاشىلىعى ينسپەكسياسىنا اتىراۋ وبلىسىنىڭ جىلىوي اۋدانىنداعى «تەڭىز-نوۆوروسسييسك» مۇناي قۇبىرىنىڭ 64ء-شى جانە 72ء-شى شاقىرىمىندا بالىق قىرىلىپ جاتقانى تۋرالى اقپارات كەلىپ تۇسكەن.
بالىق رەسۋرستارى مەن باسقا دا سۋ جانۋارلارىنىڭ قاۋىپ-قاتەرى جانە (نەمەسە) قىرىلۋى انىقتالعان كەزدە ءوزارا ءىس-قيمىل سحەماسىنا سايكەس بارلىق مۇددەلى مەملەكەتتىك ورگاندار حاباردار ەتىلدى، دەپ حابارلايدى aqshamnews.kz.
اۋىل شارۋاشىلىعى مينيسترلىگىنىڭ مالىمەتىنشە، كوميسسيا شاباقتاردىڭ قىرىلعان جەرىنە باردى، اقپارات راستالدى. جينالعان شاباقتاردىڭ سالماعى 127 كيلوگرامم.
اتىراۋ وبلىسى بويىنشا ەكولوگيا دەپارتامەنتى زەرتحانالىق زەرتتەۋلەر ءۇشىن سۋ سىنامالارىن الدى. شاباقتاردىڭ قاتتى ىدىراۋىنا بايلانىستى، بالىقتىڭ قىرىلۋ سەبەپتەرىن انىقتاۋ ءۇشىن سىناما الۋ مۇمكىن بولمادى.
كوكتەمگى سۋ تاسقىنى سالدارىنان جەم وزەنى ارناسىنان اسىپ، شاباقتار وزەن سۋىمەن تاياز ويىقتارعا جينالعان.
بالىق شاباقتارى قىرىلۋىنىڭ بولجامدى سەبەبى سۋدا وتتەگىنىڭ جەتىسپەۋشىلىگى.
جەرگىلىكتى اتقارۋشى ورگاندارمەن بىرلەسىپ، سانيتارلىق نورمالاردى ساقتاي وتىرىپ، قىرىلعان بالىق شاباقتارىن جيناۋ بويىنشا جۇمىس جۇرگىزىلدى.