جايىق-كاسپيي باسسەينىنىڭ سۋ ايدىندارىندا «بەكىرە – 2023» كەڭ اۋقىمدى اكسياسى باستالعاننان بەرى براكونەرلەردەن 7،5 توننادان استام بالىق تاركىلەندى.
بالىق شارۋاشىلىعى كوميتەتى باسپا ءسوز قىزمەتىنىڭ مالىمەتىنشە، اتالعان اكسيا 1 ساۋىردە باستالعان. سودان بەرى جايىق-كاسپيي وبلىسارالىق باسسەيندىك بالىق شارۋاشىلىعى ينسپەكسياسىنىڭ ينسپەكتورلارى شەكارا قىزمەتىنىڭ جانە قۇقىق، تابيعات قورعاۋ ورگاندارى قىزمەتكەرلەرىمەن بىرگە زاڭسىز بالىق اۋلاۋعا قاتىستى 754 دەرەكتى انىقتادى. قۇقىق بۇزعان 518 ادام اكىمشىلىك جاۋاپقا تارتىلدى.
«براكونەرلىككە، سيرەك كەزدەسەتىن جانە جويىلىپ كەتۋ ءقاۋپى تونگەن بالىق تۇرلەرىن زاڭسىز اۋلاۋعا بايلانىستى 28 قىلمىستىق ءىس قوزعالدى. زاڭ بۇزۋشىلارعا 11،1 ملن تەڭگەگە ايىپپۇل سالىندى. زاڭسىز اينالىمنان 7 توننا 534 كەلى بالىق، ونىڭ ىشىندە 770،25 كەلى بەكىرە تۇقىمداس بالىق تۇرلەرى، 29،5 كەلى قارا ۋىلدىرىق الىندى. براكونەرلەردەن 257 بالىق اۋلاۋ قۇرالى، 62 سۋ كولىگى مەن 12 اۆتوماشينا تاركىلەندى. بالىق رەسۋرستارىنا 400 ملن تەڭگەدەن استام زالال كەلتىرىلدى»، - دەپ حابارلادى كوميتەتتىڭ باسپا ءسوز قىزمەتىنەن.
جايىق وزەنىنىڭ ارناسى مەن كاسپيي تەڭىزىنىڭ اكۆاتورياسىنداعى سۋ ايدىندارىنان جالپى ۇزىندىعى 60 شاقىرىمنان اساتىن 663 زاڭسىز بالىق اۋلاۋ قۇرالى تابىلعان.