وسىدان تۋرا 30 جىل بۇرىن، 28 قىركۇيەكتە تاجىك-اۋعان شەكاراسىندا قازاقستاندىق شەكاراشى رادجان باتىرقانوۆ ەرلىكپەن قازا تاپتى. شەكارانى بۇزعان سودىرلارمەن بولعان كۇشى تەڭ ەمەس ۇرىستا كومانديرى مەن قارۋلاستارىنىڭ ءومىرىن ساقتاپ قالۋ ءۇشىن سودىرلاردىڭ وعىن وزىنە بۇرعان رادجاننىڭ ەرلىگى ماڭگى ۇمىتىلمايدى.
بۇگىندە كىشى سەرجانت ر.باتىرقانوۆتىڭ ەسىمىن ەنشىلەگەن شەكارا بولىمشەسى جاس شەكاراشى ساربازداردى باتىرلىق پەن پاتريوتتىققا ۇندەيتىن تاربيە ورتالىعىنا اينالعان. ءوزى تۋعان قاتونقاراعايدا كوشە مەن مەكتەپتەگى ءمۇيىس باتىردىڭ ەسىمىمەن اتالادى.
ەرلىك جولى
1994 جىلعى 28 قىركۇيەكتە حاكيم بانداسىنىڭ ەكى جۇزدەن استام قارۋلى سودىرى 9 اۆتوكولىكپەن تاجىكستاننىڭ حوروگ قالاسى ماڭىنداعى مەملەكەتتىك شەكاراسىن كەسىپ ءوتىپ، اۋعانستانعا وتۋگە بەت الادى. ولاردىڭ جولىنا 38 قازاقستاندىق جانە رەسەيلىك شەكاراشى توسقاۋىل بولىپ تۇرادى.سوعىسقا ءبىرىنشى بولىپ كىرگەن رەسەيلىك وفيسەر كونستانتين سەليۋك پەن رادجان باتىرقانوۆ قارۋلاستارىنا مودجاحەدتەرگە تىلدان شابۋىلداۋعا مۇمكىندىك بەرەدى. الايدا ۇرىستا اۋىر جاراقات العان رادجان كوپ قان جوعالتىپ، ەسىن جيماستان قايتىس بولدى. ۇرىستىڭ ناتيجەسىندە مودجاحەدتەر جويىلىپ، سودىرلاردىڭ كەپىلىندەگى ادامدار قۇتقارىلدى.
كورسەتكەن ەرلىگى مەن باتىلدىعى ءۇشىن كىشى سەرجانت ر.باتىرقانوۆ قازا تاپقاننان كەيىن قازاقستان رەسپۋبليكاسى پرەزيدەنتىنىڭ جارلىعىمەن ءىى دارەجەلى «ايبىن» وردەنىمەن ماراپاتتالدى. بۇل ەرلىك وتاندى شەكسىز ءسۇيۋدىڭ جارقىن ۇلگىسى بولىپ تابىلادى. تاۋەلسىزدىگىمىزدىڭ 30 جىلدىعىنا وراي باتىر شەكاراشى تاجىكستان رەسپۋبليكاسىنىڭ جوعارى ناگراداسى ءى دارەجەلى «سپيتامەن» وردەنىنىڭ يەگەرى اتاندى.
2024 جىلدىڭ 28 قىركۇيەگىندە ەلىمىزدىڭ تۇكپىر-تۇكپىرىندە شەكاراشى ر.باتىرقانوۆتىڭ ەسىمىن ۇلىقتاپ، ەرلىگىنە تاعزىم ەتۋگە ارنالعان شارالار ءوتتى. سولاردىڭ ءبىرى ۇقك شەكارا قىزمەتى الماتى وبلىسى بويىنشا دەپارتامەنتى ۇيىمداستىرعان ءىس-شارا بولدى. شەكاراشى ارداگەرلەر مەن جەكە قۇرام ماڭگىلىك الاۋ باسىنا گۇل شوقتارىن قويىپ، ۇلى وتان سوعىسىنىڭ باتىرلارىنا جانە تاۋەلسىزدىك جىلدارى ەرلىكپەن قازا تاپقان شەكاراشىلاردىڭ رۋحىنا تاعزىم جاسادى. ودان كەيىن №102 ورتا مەكتەبىنىڭ وقۋشىلارى «جاس شەكاراشى» اسكەري-پاتريوتتىق كلۋبىنىڭ قاتارىنا كىرۋ ءۇشىن انت قابىلدادى.
بۇدان بىلاي №102 ورتا مەكتەپتىڭ 7 «ءا» سىنىبى ر.باتىرقانوۆتىڭ ەسىمىمەن اتالاتىنى تۋرالى حاباردى دەپارتامەنت باستىعىنىڭ ورىنباسارى پولكوۆنيك ا.مۇنالبايەۆ ماڭگىلىك الاۋ باسىنا جينالعان كوپشىلىككە جەتكىزدى. بۇدان ءارى جاس پاتريوتتار ارميا ۇيىنە بارىپ، ي.پانفيلوۆ مۇراجايىن ارالاپ كوردى.
ءيا، وتانعا دەگەن شىنايى سۇيىسپەنشىلىك شەكاراشىلارىمىزدى بەيبىت كۇندە دە ەرلىك ىستەرگە باستايدى. ۇقك شەكارا قىزمەتىنىڭ حاس باتىرىنا اينالعان رادجان باتىرقانوۆتىڭ ەرلىگى — ءسوزىمىزدىڭ جارقىن ۇلگىسى.