اتى اڭىزعا اينالعان «گۇلدەر» ءانسامبلى قايتا قۇرىلادى

ءانسامبلدىڭ تۇساۋكەسەرى جەلتوقسان ايىندا وتەدى.

بۇل تۋرالى روزا باعلانوۆا اتىنداعى «قازاقكونسەرت» مەملەكەتتىك كونسەرتتىك ۇيىمىنىڭ ديرەكتورى اقتوتى رايىمقۇلوۆا مالىمدەدى، دەپ حابارلايدى Almaty-akshamy.kz.

بيىل قازاقستاننىڭ 76 ەلمەن قۇرىلعان ديپلوماتيالىق قارىم-قاتىناستاردىڭ 30 جىلدىعى اتالىپ وتىلەدى. وسىعان وراي «قازاقكونسەرت» مەملەكەتتىك كونسەرتتىك ۇيىمى «الەم ساز» اتتى حالىقارالىق دەڭگەيدەگى جوبانى باستادى. فەستيۆال اياسىندا ءارتۇرلى ەلدەردەن كەلگەن مۋزىكانتتار، بيشىلەر، اسپاپشىلار، اسپاپتانۋشىلار ءوز ونەرلەرىن ورتاعا سالادى.

سونىمەن قاتار ەلىمىزدىڭ برەندىنە اينالعان «گۇلدەر» ءانسامبلى قايتا جاڭعىرتىلىپ، «قازاقكونسەرت» اياسىندا اشىلادى. كۇردەلى جانە كاسىبي ىرىكتەۋدەن وتكەن جاس تالانتتى مۋزىكانتتار، بيشىلەر ءقازىر دايىندالىپ جاتىر. ءانسامبلدىڭ تۇساۋكەسەرى جەلتوقسان ايىندا وتكىزىلمەك. 

سونداي-اق، بيىل بالالار جىلىنا وراي ءبىرقاتار جوبا قولعا الىندى. 

«ارمان اسۋلارى» اتتى ەرەكشە قاجەتتىلىكتەرى بار ينكليۋزيۆتى تالانتتى جاستارعا ارنالعان جوبا اكىمشىلىكتەرمەن جانە قوعامدىق قورلاردىڭ قاتىسۋىمەن جۇزەگە اسىرىلادى. سونىمەن قاتار بالالار فيلارمونياسى "جازعى كينو" اتتى جوبالاردى جاس بۇلدىرشىندەرگە ۇسىنۋدا. جاز بويى 25 مىڭنان استام بالا «قازاقستان» ورتالىق كونسەرت زالىندا وتاندىق، كينو، انيماسيالىق تۋىندىلاردى تاماشالادى، - دەدى ا.رايىمقۇلوۆا.