بالاباقشالار سانىن كوبەيتۋگە مۇمكىندىك بولسا دا، ساپا ماسەلەسى وزەكتى بولىپ قالا بەرەدى - مينيستر
سوڭعى 10 جىلدا جەكەمەنشىك بالاباقشالار سانى كۇرت ارتىپ، 3 جاستان 6 جاسقا دەيىنگى بالالار بىردەن 99%-عا دەيىن قامتىلدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ جەلىدەگى پاراقشاسىندا جازدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«ون جىلدان استام ۋاقىت بۇرىن بالاباقشالار سانىنىڭ جىلدام ءوسۋىن ىنتالاندىرۋ ءۇشىن ليسەنزيالاۋدان، كەيىن مەملەكەتتىك باقىلاۋدان، مونيتورينگتەن جانە ولاردىڭ قىزمەتىن رەتتەۋدەن باس تارتۋ تۋرالى شەشىم قابىلداندى. ول قانداي ناتيجە بەردى؟ جەكەمەنشىك بالاباقشالار سانى كۇرت ارتىپ، 3 جاستان 6 جاسقا دەيىنگى بالالار بىردەن 99%-عا دەيىن قامتىلدى. بۇل - جاقسى ناتيجە. الايدا بالاباقشالار سانىن كوبەيتۋگە مۇمكىندىك بولسا دا، ساپا ماسەلەسى وزەكتى بولىپ قالا بەرەدى. بالاباقشالاردىڭ جارتىسى تەحنيكالىق جانە سانيتارلىق تالاپتارعا ساي كەلمەيتىن عيماراتتاردا، بىلىكتى ماماندارسىز جانە ءقاۋىپتى جاعدايلاردا اشىلعان. مۇنداي فاكتىلەر جەتكىلىكتى. ەكى جىل بۇرىن ءبىز ليسەنزيالاۋ مەن مەملەكەتتىك باقىلاۋدى قايتارۋعا ارەكەت جاسادىق. الايدا سول كەزدە كاسىپكەرلەر پالاتاسىنىڭ، بالاباقشالار قاۋىمداستىعىنىڭ جانە ءبىرقاتار مەملەكەتتىك ورگاننىڭ ۇستانىمى بۇل نورمانى زاڭعا ەنگىزۋگە مۇمكىندىك بەرمەدى. ءبىراق ءبىز بۇل باعىتتا جۇمىستى توقتاتپادىق. بىلتىرعى جىلدىڭ سوڭىندا مەملەكەتتىك اتتەستاتتاۋ جۇيەسىن ەنگىزە الدىق. اتتەستاسيا ناتيجەسى كوڭىلدەن شىقپادى. تەكسەرىستەن وتكەن بالاباقشالاردىڭ 80%-ى مەملەكەتتىك اتتەستاسيادان وتە المادى. اڭگىمە بالاباقشاداعى بۇلدىرشىندەرگە قولايلى جاعداي جاسالماۋى، وقۋ-تاربيە جۇمىستارىنىڭ مەملەكەتتىك ءبىلىم بەرۋ ستاندارتىنا، قاۋىپسىزدىك تەحنيكاسى، ءورت جانە سانيتارلىق نورمالاردىڭ تالاپتارعا سايكەس كەلمەۋى، تاربيەشىلەردىڭ قول كوتەرۋى جانە باسقا دا كەلەڭسىز فاكتىلەر تۋرالى بولىپ وتىر»، - دەدى ءبىلىم ءمينيسترى.
سونىمەن قاتار مينيستر بالاباقشا تاربيەشىلەرىنىڭ جالاقىسىن كوبەيتۋ بويىنشا پيلوتتىق جوبا باستالعانى تۋرالى ايتتى.