اتوم ەنەرگياسى قازىرگى تاڭدا ماڭىزدى ەنەرگەتيكالىق رەسۋرسقا اينالدى

2050 جىلعا قاراي الەمدە اتوم ەلەكتر ەنەرگياسىن ءوندىرۋ كولەمى 2،5 ەسە ارتۋى مۇمكىن دەگەن بولجام بار. بۇل تۋرالى ماگاتە اگەنتتىگى مالىمدەدى، دەپ حابارلايدى aqshamnews.kz

قازىرگى تاڭدا 31 مەملەكەت اتوم ەلەكتر ستانسيالارىنىڭ ارتىقشىلىقتارىن پايدالانىپ وتىر، ال تاعى 30 مەملەكەت وسىنداي قۋات كوزىن ءوندىرۋدى قولعا الۋدى جوسپارلاۋدا. تۇركيا، مىسىر جانە بانگلادەش ەلدەرىندە اتوم ستانسيالارىنىڭ قۇرىلىسى اياقتالۋعا جاقىن، الداعى بىرنەشە جىلدا ولار ىسكە قوسىلادى.

اتوم ەنەرگياسى جونىندەگى حالىقارالىق اگەنتتىكتىڭ مالىمەتىنشە، الەمدە اتوم ەنەرگەتيكاسىنا دەگەن قىزىعۋشىلىق ارتىپ كەلەدى. سالا شاعىن رەاكتورلار تەحنولوگياسىنىڭ دامۋىمەن دە كۇشەيە تۇسەدى دەپ كۇتىلۋدە.

ەۋروپا كەڭەسى باس حاتشىسىنىڭ ورىنباسارى ءبورن بەرگە بۇل تۋرالى: – جاقىندا بۇۇ ەسەبىن وقىدىم، وندا اتوم ەنەرگياسىنىڭ ەكولوگيالىق تۇرعىدان تازا ەكەنى ايتىلعان. قاۋىپسىزدىك جۇيەلەرى، پروسەدۋرالار مەن اتقارىلعان جۇمىستار اتوم ەنەرگياسىنا دەگەن قىزىعۋشىلىقتى ارتتىردى، – دەدى.

جاپونيانىڭ ستراسبۋرگتەگى باس ەلشىسى حيرويۋكي ۋشيدا دا پىكىر ءبىلدىرىپ:

– اتوم ەنەرگياسى قازىرگى تاڭدا ماڭىزدى ەنەرگەتيكالىق رەسۋرسقا اينالدى. بۇل سالادا ەڭ باستىسى – ەنەرگيا قاجەتتىلىگى مەن قاۋىپسىزدىك اراسىنداعى تەپە-تەڭدىكتى ساقتاۋ، – دەپ اتاپ ءوتتى.