پاريجدە ەكونوميكالىق ىنتىماقتاستىق جانە دامۋ ۇيىمىنا (ەىدۇ) مۇشە ەلدەردىڭ مينيسترلەرى اتوم ەنەرگەتيكاسىن دامىتۋ بويىنشا ناقتى قادامداردى تالقىلادى، دەپ حابارلايدى aqshamnews.kz
اقش، كانادا، جاپونيا، وڭتۇستىك كورەيا جانە ەۋروپانىڭ 9 مەملەكەتى وسى ورتاق باستاماعا قوسىلۋعا دايىن ەكەنىن ءبىلدىردى. باستامانىڭ ماقساتى – جاڭا رەاكتورلاردىڭ قۇرىلىسىن قارجىلاندىرۋ، جەتكىزۋ تىزبەگىن دامىتۋ جانە بىلىكتى كادرلار دايارلاۋ.
كوپتەگەن ەۋرووداق ەلدەرى اتوم ەنەرگياسىنا قايتا ورالۋدا. مىسالى، شۆەسيا 2035 جىلعا دەيىن ەلەكتر ەنەرگياسىن ءوندىرۋ كولەمىن ەكى ەسەگە ارتتىرۋ ءۇشىن 10 جاڭا رەاكتور سالۋعا دايىن. ەىدۇ جانە اتوم ەنەرگياسى اگەنتتىگىنىڭ جاڭا باستامالارىن قولدايتىن ەلدەر قازاقستانمەن ىنتىماقتاستىقتى تەرەڭدەتۋگە مۇددەلى، سەبەبى بۇل يادرولىق ەنەرگەتيكا ۇلەسىن 2050 جىلعا قاراي ءۇش ەسەگە ارتتىرۋعا مۇمكىندىك بەرەدى.
شۆەسيانىڭ ۆيسە-پرەمەر-مينيسترى ەببا بۋش وسىعان قاتىستى ءوز پىكىرىن ءبىلدىرىپ، بىلاي دەدى:
– شۆەسيا اتىنان مىنانى ايتقىم كەلەدى: ءبىز مۇددەلەرى مەن قۇندىلىقتارى ۇقساس ەلدەرمەن عالامدىق دەڭگەيدە بىرلەسىپ، اتوم ەنەرگەتيكاسىن يگەرۋ بويىنشا ىنتىماقتاستىقتى نىعايتقىمىز كەلەدى. وسى باعىتتا ەۋروپالىق ارىپتەستەرمەن، سونداي-اق اقش جانە كانادامەن بىرنەشە مەموراندۋمعا قول قويدىق. ەندى ازيانىڭ وزىق تاجىريبەگە يە كەيبىر ەلدەرىمەن تىعىز بايلانىس ورناتۋدى جوسپارلاپ وتىرمىز.
ەەدۇ يادرولىق ەنەرگيا اگەنتتىگىنىڭ باس ديرەكتورى ۋيليام مەگۆۋد قازاقستاننىڭ عالامدىق نارىقتاعى ماڭىزىن اتاپ ءوتتى:
– ۋراننىڭ ءىرى جەتكىزۋشىسى رەتىندە قازاقستان اتوم ەنەرگياسىنىڭ الەمدىك نارىعىنا ۇلكەن اسەر ەتتى. بۇل كەزەڭدە باعا تومەندەپ، جەتكىزۋ قاۋىپسىزدىگى كۇشەيدى. وسى ورايدا قازاقستاننىڭ ءرولى وتە ماڭىزدى.