18 ساۋىردە اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل ماريانو گروسسي قازاقستانعا كەلەدى. بۇل تۋرالى ب ا ق وكىلدەرىمەن وتكەن بريفينگتە ءسىم رەسمي وكىلى ايبەك سمادياروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«18 ساۋىردە اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل ماريانو گروسسي جۇمىس ساپارىمەن قازاقستانعا كەلەدى. ساپار بارىسىندا مەملەكەت باسشىسىمەن، ق ر سىرتقى ىستەر، ەنەرگەتيكا جانە دەنساۋلىق ساقتاۋ مينيسترلەرىمەن كەزدەسەدى، سونداي-اق وسكەمەندەگى ءۇلبى مەتاللۋرگيا زاۋىتىنىڭ اۋماعىندا ورنالاسقان اگەنتتىكتىڭ از بايىتىلعان ۋران بانكىنە بارادى»، - دەپ ءمالىم ەتتى ۆەدومستۆونىڭ رەسمي وكىلى ايبەك سمادياروۆ.
ول سونىمەن بىرگە قازاقستاندىق دەلەگاسيا 18-19 ءساۋىر ارالىعىندا جەنيەۆادا وتەتىن بۇۇ-نىڭ ەۋروپالىق ەكونوميكا كوميسسياسىنىڭ 70ء-شى سەسسياسىنا قاتىساتىنىن ايتتى.
جيىننىڭ تاقىرىبى – ەۋروپالىق ەكونوميكالىق كوميسسيا وڭىرىندەگى ورنىقتى دامۋ مۇددەسى ءۇشىن سيفرلىق جانە جاسىل ترانسفورماسيا.