اەس سالۋدىڭ وڭتايلى ورنى رەتىندە الماتى وبلىسى ۇسىنىلدى.
2023 جىلى ەلىمىزدە اتوم ەلەكتر ستانسياسىن سالۋ تەحنولوگياسى تاڭدالادى. ەنەرگەتيكا ءمينيسترى بولات اقشولاقوۆ بۇل رەتتە ءتورت ەلدىڭ تەحنولوگياسى قاراستىرىلاتىنىن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2009 جىلدان باستاپ قازاقستان تابيعي ۋران كولەمى بويىنشا الەمدە ءبىرىنشى ورىندا. بيىلعى جىلدىڭ قورىتىندىسى بويىنشا، ۋران ءوندىرۋ 21،6 مىڭ توننا كولەمىندە دەگەن بولجام بار. وسى جىلى جەلتوقساندا قىتايعا جىلۋ بولەتىن جيناقتاردىڭ ءبىرىنشى پارتياسى جەتكىزىلدى. اتوم ەلەكتر ستانسياسىن سالۋدىڭ وڭتايلى ورنى رەتىندە الماتى وبلىسىنىڭ جامبىل اۋدانى ۇسىنىلدى»، - دەدى بولات اقشولاقوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ءمينيستردىڭ ايتۋىنشا، اەس سالۋ بويىنشا CNNC (جۇڭگو)، روساتوم (رەسەي)، KHNP (كورەيا)، EDF (فرانسيا) جەتكىزۋشىلەرىنىڭ رەاكتورلىق تەحنولوگيالارىنىڭ ءتىزىمى جاسالدى.
«2023 جىلى اتالعان تەحنولوگيالاردىڭ ءبىرى تاڭدالادى. تىزىمدە ءتورت ەل - قحر، وڭتۇستىك كورەيا، فرانسيا جانە رەسەي فەدەراسياسى بار. سونىڭ اراسىنان تاڭداۋ جاسايمىز. ودان بولەك، قازاقستاننىڭ يادرولىق ينفراقۇرىلىمىنا كەشەندى شولۋ جاساۋدا اتوم ەنەرگياسى جونىندەگى حالىقارالىق اگەنتتىكتىڭ ميسسياسىن ۇيىمداستىرۋ جوسپارلانىپ وتىر»، - دەيدى ول.
ەسكە سالايىق، ەنەرگەتيكا ءمينيسترى بيىل ماۋسىمدا اتوم ەلەكتر ستانسياسى سالىناتىن جەردە زەرتتەۋ جۇمىستارى باستالعانىن حابارلاعان ەدى.