ماجىلىستە كىشكەنتاي بالالارى بار اتا-انالاردىڭ قىسقارتىلعان جۇمىس ۋاقىتىنا دەگەن قۇقىعىنىڭ ورىندالۋ ماسەلەسى تالقىلاندى، دەپ حابارلايدى aqshamnews.kz
دەپۋتاتتار بۇل قۇقىق زاڭدا بار بولعانىمەن، ءىس جۇزىندە تولىق جۇزەگە اسپاي وتىرعانىن ايتتى.
ءماجىلىس دەپۋتاتى قاراقات ابدەن ەڭبەك جانە حالىقتى الەۋمەتتىك قورعاۋ ۆيسە-مينيسترى اسقاربەك ەرتايەۆقا اتا-انالاردىڭ جۇمىس ۋاقىتىن قىسقارتۋ مۇمكىندىگى تۋرالى سۇراق قويدى. ونىڭ ايتۋىنشا، كوپتەگەن اتا-انا بالا كۇتىمىن ۇيىمداستىرۋ نەمەسە بالاباقشادان ۋاقىتىندا الىپ كەتۋ قيىندىقتارىنا تاپ بولىپ وتىر.
"بۇعان دەيىنگى زاڭناما اتا-انالارعا قىسقارتىلعان جۇمىس ۋاقىتىنا قۇقىق بەرەدى. الايدا بۇل قۇقىق بۇگىنگى كۇنى تولىق ساقتالىپ وتىرعان جوق"، دەدى دەپۋتات.
ۆيسە-مينيستر ەرتايەۆتىڭ ايتۋىنشا، جۇمىس بەرۋشى مەن جۇمىسكەر ەڭبەك شارتىن جاساعاندا جۇمىس ۋاقىتىن ءوزارا كەلىسۋگە قۇقىلى. مىسالى، جۇمىس كۇنىن تاڭعى 8:00–18:00 نەمەسە 9:00–17:00 ارالىعىندا بەلگىلەۋگە بولادى. سونداي-اق سەنبى كۇنىن قوسىمشا كەلىسىم ارقىلى جۇمىس ۋاقىتىنا ەنگىزۋگە مۇمكىندىك بار.
ەگەر جۇمىس بەرۋشى قىسقارتىلعان جۇمىس ۋاقىتىنا كەلىسپەسە، جۇمىسكەر زاڭعا سايكەس شاعىم تۇسىرە الادى. ارىز مەملەكەتتىك ەڭبەك ينسپەكسياسىنا جىبەرىلەدى، ولار جاعدايدى باقىلاپ، قاجەت كومەك كورسەتەدى.
دەپۋتاتتار اتا-انالاردىڭ جۇمىس رەجيمىنە قاتىستى قۇقىقتارىن ناقتى ورىنداۋ ماڭىزدى ەكەنىن اتاپ ءوتتى.