الماتىدا تۇڭعىش رەت تابانىنىڭ ءپىشىنى بۇزىلعان 16 جاسار بالاعا كۇردەلى وتا جاسالدى
ءجاسوسپىرىم اناسىنان سيرەك كەزدەسەتىن اقاۋمەن تۋعان. قوس تابانىنىڭ ءپىشىنى بۇزىلىپ، الدىڭعى بولىگى ءيىلىپ تۋعان (ات تابان) بالاعا الماتىداعى №2 قالالىق كلينيكالىق بالالار اۋرۋحاناسىندا بىرەگەي وپەراسيا جاسالدى، دەپ حابارلايدى اlmaty-akshamy.kz.
اۋرۋحانا باسپا ءسوز قىزمەتىنىڭ مالىمەتىنشە، اسا كۇردەلى حيرۋرگيالىق مانيپۋلياسيانى №2 قكبا دارىگەرلەرى ءۇش كۇندىك حالىقارالىق شەبەرلىك كلاسى شەڭبەرىندە رەسەيلىك ماماندار ماكسيم ۆاۆيلوۆ جانە تيمۋر تورنومەن بىرلەسىپ جاسادى. شەبەرلىك كلاسى 13-15 قازان ارالىعىندا ءوتتى.
«اۋىر اقاۋلارعا شالدىققان بالالارعا بىلىكتى حيرۋرگيالىق كومەك كورسەتۋ ماقساتىندا ۇيىمداستىرىلعان شەبەرلىك كلاسى «ميلوسەرديە» ەرىكتى قوعامى مەن قالالىق قوعامدىق دەنساۋلىق ساقتاۋ باسقارماسىنىڭ تىكەلەي قاتىسۋىمەن ءوتىپ جاتىر. شارا شەڭبەرىندە بارلىعى اياق-قولى ىشتەن قاتتى كەمىس بولىپ تۋعان نەمەسە اتروفياعا جۇرە-بارا دۋشار بولعان 7 بالاعا وتا جاسالماق. حيرۋرگيا سالاسى دامىپ جاتىر، ءبىز ميكروحيرۋرگيالىق وتانىڭ زاماناۋي ادىستەرىن مەڭگەرىپ جاتىرمىز. قالپىنا كەلتىرۋگە باعىتتالعان ورتوپەديالىق وتالار شەتەلدە وتە قىمبات تۇرادى. ال بىزدە تەگىن مەديسينالىق كومەك جانە ءمامس پاكەتتەرى ارقىلى كورسەتىلەدى»، - دەيدى اۋرۋحانا ديرەكتورى مارات راباندياروۆ.
حابارلاماعا سۇيەنسەك، 16 جاستاعى پاسيەنتتىڭ قوس تابانى يمەك تارىزدەس پىشىندە. «ات تابانى» دەپ اتالاتىن كاۆۋستىق تابان 100 مىڭ حالىقتىڭ ىشىندە 30 شاقتى ادامدا كەزدەسۋى مۇمكىن. دەرتكە ايەلدەردەن گورى ەرلەر جاعى بەيىم كەلەدى. ادەتتە تاباننىڭ يىلۋىنە جاۋاپ بەرەتىن ابدۋكتورلار مايىسادى، سالدارىنان تابان دا يمەك تارىزدەنىپ كەتەدى.
«تابانى شەكتەن تىس ۇلكەن بولعاندىقتان بالا اياق-كيىم كيە المايتىن. تاباننىڭ يىلەتىن جەرىندەگى ديستروفيالىق وزگەرىستەر ادامدى ءجۇرۋ قابىلەتىنەن ايىرادى. سوندىقتان مىندەتتى تۇردە حيرۋرگيالىق وپەراسيا جاساۋ قاجەت. ءبىز تاباننىڭ تىرەكتىك قىزمەتىن قالپىنا كەلتىرۋگە ارنالعان كۇردەلى وتا جاسادىق. وپەراسيا كەزىندە تابانداعى بۋىنداردىڭ ءبىرى تولىعىمەن الىپ تاستالادى. تابان تۇزەتىلىپ، ارنايى ۆينتتەرمەن بەكىتىلەدى»، - دەيدى №2 قكبا تراۆماتولوگيا بولىمشەسى مەڭگەرۋشىسى ەرلان سادىربالين.
ايتۋىنشا، مۇنداي وتا بۇرىن-سوڭدى الماتىدا بالالارعا مۇلدە جاسالماعان. پاسيەنت 1،5 - 2 ايعا دەيىن اياعىنداعى گيپستى شەشپەيدى. گيپس الىنعاننان كەيىن اۋرۋحانانىڭ رەابيليتاسيا بولىمىندە وڭالتۋدان وتەدى. وزدىگىنشە جۇرە باستاعان سوڭ تىركەلگەن ەمحاناعا بارىپ وڭالتۋدىڭ 3-كەزەڭى بويىنشا ەمدەلەدى.
