بۇل تۋرالى دەپۋتاتتىق ساۋالىندا سەناتور امانگەلدى تولاميسوۆ ايتتى.
دەپۋتاتتىڭ ايتۋىنشا، كەيىنگى 5 جىلدا اسىراپ الىنعان جەتكىنشەكتەردى بالالار ۇيىنە قايتارۋ فاكتىلەرى 64 پايىزعا ارتقان. 2020 جىلى 160 بالا، 2021 جىلى – 197، 2022 جىلى 217 بالا قايتارىلعان. اسىراپ العان بالاسىنان باس تارتقان اتا-اناعا مەملەكەت تاراپىنان بەرىلگەن 75 اەك كولەمىندەگى قاراجاتتى مەملەكەتكە كەرى قايتارۋ، اليمەنت تولەۋ جانە ەكىنشى رەت بالا اسىراپ الۋ مۇمكىندىگىنەن ايىرۋ سياقتى قۇقىقتىق جاۋاپكەرشىلىك شارالارى زاڭدا قاراستىرىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
مۇنداي جاعدايلار بالانىڭ پسيحيكالىق دەنساۋلىعىنا قاتتى اسەر ەتەدى. سونىمەن قاتار، بالالار ەڭبەگىن پايدالانۋ فاكتىلەرى دە تىركەلگەن.
«بالا اسىراپ الۋشىلاردى 3 جىلعا دەيىن تولىق باقىلاۋىندا ۇستاپ، ارنايى سۇيەمەلدەۋ جۇمىستارىن جۇرگىزىپ وتىراتىن بالا اسىراپ الۋ ۇلتتىق اگەنتتىگى بار. اتالعان اگەنتتىك اياسىندا اتا-انالارعا سۇيەمەلدەۋشىلىك كومەك، پسيحولوگ، زاڭگەر سىندى مامانداردىڭ قىزمەتى ۇسىنىلادى. الايدا بۇل اگەنتتىكتىڭ مۇمكىندىگى بارلىق ەل اۋماعىن قامتۋعا ءالى دە جەتپەيتىنى بەلگىلى. بۇل تۇرعىدا بالا اسىراپ الۋعا نيەت بىلدىرگەن ازاماتتارمەن جۇمىس ىستەيتىن ورتالىقتاردىڭ اۋقىمىن كەڭەيتىپ، الەۋمەتتىك قىزمەتكەردىڭ سانىن كوبەيتۋ قاجەت»، - دەدى ا. تولاميسوۆ ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.
ونىڭ پايىمىنشا، بالا اسىراپ الۋشى اتا-انالارعا ارنالعان مامانداندىرىلعان ورتالىقتاردىڭ جۇمىسىن كەڭەيتۋ كەرەك.
«اتالعان اقپاراتتاردىڭ قاتارىنا اسىراپ الىنعان بالا قايتارىلعان كەزدەگى زاڭ الدىنداعى جاۋاپكەرشىلىگى تۋرالى اقپارات تا ەنگىزىلسە. سونىمەن قاتار، بالا اسىراپ الۋشى اتا-انالارعا ارنالعان ارنايى مامانداندىرىلعان مەكتەپ نەمەسە ورتالىقتاردىڭ جۇمىسىن كەڭەيتۋ ماڭىزدى. بەلگىلى ءبىر ۋاقىتتان كەيىن اسىراپ العان بالادان باس تارتقان وتباسىلارعا زاڭ جۇزىندە جاۋاپكەرشىلىكتى ءالى دە بولسا كۇشەيتۋ، مورالدىق شىعىن رەتىندە قوماقتى مولشەردە ايىپپۇل سالۋ ماسەلەسى قاراستىرىلۋى كەرەك»، - دەدى امانگەلدى تولاميسوۆ.