سپورت كۇنىنە وراي ناۋرىزباي اۋدانىندا ۇلتتىق ويىن اسىق اتۋدان جارىس ۇيىمداستىرىلدى
قازاقستانداعى سپورت كۇنى تامىز ايىنىڭ ءۇشىنشى جەكسەنبىسىنە سايكەس كەلەدى. اتاۋلى كۇنگە وراي ناۋرىزباي اۋدانى اكىمدىگىنىڭ اۋماعىندا ورنالاسقان امفيتەاتر الاڭىندا جەرگىلىكتى تۇرعىندار اسىق جارىسىنان ب ا ق سىنادى، دەپ حابارلايدى Almaty-akshamy.kz.
جارىس قالا جاستارى اراسىندا ۇلتتىق ويىنداردى ناسيحاتتاۋ جانە ولاردى دامىتۋ ماقساتىندا وتكىزىلدى. اسىق اتۋدان قالالىق گراند-فينالدىڭ ءبىرىنشى ىرىكتەۋ كەزەڭىندە باس جۇلدە – Renault Logan اۆتوكولىگى تىگىلدى. بايقاۋدىڭ دەمەۋشىسى جانە ۇيىمداستىرۋشىسى ناۋرىزباي اۋدانى اكىمدىگىنىڭ قولداۋىمەن Sirage مەديا پلاتفورماسىنىڭ نەگىزىن قالاۋشى، بلوگەر، ىقپال ەتۋشى شون ومەن بولدى.
شوڭ ومەننىڭ ايتۋىنشا، الماتىنىڭ ءار اۋدانىندا اسىق اتۋ ۇلتتىق ويىنىنان ىرىكتەۋ كەزەڭدەرى ۇيىمداستىرىلادى. قاتىسۋشىلار سانى شەكتەۋلى، 32 ويىنشىدان تۇرادى. ءبىرىنشى بولىپ تىركەلگەندەر ىرىكتەۋ كەزەڭىنە وتەدى. بايقاۋعا قاتىسۋشىنىڭ اتى-جونىندە تىركەلگەن جەكە كولىگى بولماۋى كەرەك، سونىمەن قاتار ۇتىس ويىنى تۋرالى جاڭالىقتاردى جىبەرىپ الماۋ ماقساتىندا @seanomen Instagram پاراقشاسىنا جازىلۋ قاجەت.
قاجەتتى شارتتار ورىندالسا، كەرى بايلانىس ءۇشىن ۇيىمداستىرۋشىعا تىكەلەي Instagram جەلىسىندە تولىق ءاتى-جونىڭىزدى، تۋعان جىلىڭىزدى، تەلەفون ءنومىرىڭىزدى كورسەتىپ، حات جازۋىڭىز كەرەك.
– اۋداندىق سپارتاكيادادا جەڭىمپازدى ىرىكتەپ، فينالعا شىققان سەگىز سپورتشىنىڭ اراسىنان باس جۇلدە – اۆتوكولىكتى ويناتامىز، – دەدى شوڭ ومەن. - فينالدىق ۇتىس ويىنىنىڭ بارلىق قاتىسۋشىلارى مەن ادال جانكۇيەرلەر باس دەمەۋشىلەرىمىزدىڭ ارنايى سىيلىقتارىن الادى. ال چەمپيون ءوز كولىگىمەن جولعا شىعادى. اسىق اتۋدى نە ءۇشىن تاڭدادىق؟ بىزدە ۇلتتىق ويىندارعا جاتپايتىن باسقا جوبالار بار. مەن قالادا ءوستىم. اسفالتتا وسكەن قازاق جىگىتتەرى ۇلتتىق ءسالت-داستۇرىمىزدى، ويىندارىمىزدى ۇمىتا باستاعانىن كوردىم. ءبارىمىز كوبىنە ورىسشا سويلەپ، ءسالت-داستۇردى ۇمىتا باستادىق. جىگىتتەرىمىز ءوز تامىرىن ۇمىتپاسا، جاستار ۇلتتىق ويىندار ويناسا دەيمىن.
شوڭ ومەن ۇلتتىق قۇندىلىقتاردى ءورىستىلدى اۋديتورياعا جەتكىزۋ ءۇشىن قازاق ءتىلىن جەتىك بىلسە دە، الەۋمەتتىك جەلىدەگى پاراقشاسىن ورىس تىلىندە جۇرگىزەتىنىن جانە وسى ماقساتتا جەكە كولىگىن جۇلدەگە تىككەنىن ايتادى.
- كولىك جاڭا ەمەس، ءبىراق بۇل ءبىزدىڭ العاشقى سىناق قادامدارىمىز. بولاشاقتا دەمەۋشىلەردىڭ ارقاسىندا قالا ىشىندە جاڭا پاتەرلەر مەن كولىكتەردى دەگەن سەنىمدەمىن. «#qolda» دەپ اتالاتىن جوبامىز تەك اسىق اتۋ عانا ەمەس، قاتىسۋشىنىڭ كۇشىن، ەپتىلىگىن، تاپقىرلىعىن دامىتاتىن ساداق اتۋ، بايگە سياقتى قازاقتىڭ ۇلتتىق ءداستۇرلى ويىندارىنىڭ بارلىعىن وتكىزۋدى جوسپارلاپ وتىرمىز. جوبانى الدىمەن اسىق اتۋدان باستادىق، سەبەبى ۇيىمداستىرۋ جاعىنان بۇل ەڭ وڭاي ويىن. ال شارتتارعا سايكەس، ءبىزدىڭ جارىستار جەڭىلدەتىلگەن نۇسقا بولىپ تابىلادى. بۇل جولى ءبىزدىڭ ىرىكتەۋ كەزەڭىندە تەك اسىق اتۋعا ارنالعان جانە ءبىز ويىنشىلاردىڭ ۋاقىتىن شەكتەمەيمىز. بۇگىن بىزدە قاتىسۋشىلار اراسىندا جالعىز ايەل بولدى، ول وتە جاقسى ناتيجە كورسەتتى. بۇل ەنگىزىنەن جالپى جاقسى كورسەتكىش.
بايقاۋ اياسىندا امفيتەاتر ساحناسىندا تاعى ءبىر اسەرلى وقيعا – ناۋرىزباي اۋدانى «دارىن» ءبىلىم بەرۋ ورتالىعىنىڭ «قۇلاگەر» تەاترلاندىرىلعان قويىلىمىمەن ەسەپ بەرۋ كونسەرتى، بي جانە مۋزىكالىق ۇجىمدارى ونەر كورسەتتى. مۇنان كەيىن جارىستىڭ جارتىلاي فينالى باستالدى. جەڭىمپازدار اقتىق سىندا ب ا ق سىناپ، 28 جاستاعى تولەۋبەك كارىمبەكوۆ جەڭىمپاز بولىپ تانىلدى. ول ەندى كۇزدە قالانىڭ قالعان جەتى اۋدانىنىڭ چەمپيوندارىمەن جەڭىل كولىكتى ساراپقا سالاتىن بولادى.