"اسىل ارمان" تۇرعىن ءۇي كەشەنى ماڭىندا توقتاپ قالعان ەستاكادا قۇرىلىسى قايتا باستالادى

جوبا بويىنشا شارتتىق مىندەتتەمەلەر ورىندالماۋىنا بايلانىستى مەردىگەرلىك ۇيىممەن شارت بۇزىلعان بولاتىن.

بۇل تۋرالى «قازاۆتوجول» ۇلتتىق كومپانياسىنىڭ رەسمي وكىلى ءلاززات ستامعازييەۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

ونىڭ ايتۋىنشا، جاقىندا «اسىل ارمان» تۇرعىن ءۇي كەشەنىنەن شىعا بەرىستەگى ەكىنشى جول وتپەسىنىڭ قۇرىلىسى جالعاسادى. بۇگىنگى كۇنى جۇمىس 45 پايىزعا ورىندالدى.

«ءقازىر قۇرىلىس جۇمىستارىن جالعاستىراتىن جاڭا مەردىگەر كومپانيا انىقتالدى. بۇعان دەيىن جوبا بويىنشا شارتتىق مىندەتتەمەلەردىڭ ورىندالماۋىنا بايلانىستى مەردىگەرلىك ۇيىممەن شارت بۇزىلعان بولاتىن»، - دەدى «قازاۆتوجول» ۇك» اق باسپا ءسوز حاتشىسى ءلاززات ستامعازييەۆا.

ەسكە سالايىق، اقپان ايىندا الماتى-بىشكەك باعىتى بويىندا ورنالاسقان «اسىل ارمان» تۇرعىن ءۇي كەشەنىنىڭ تۇرعىندارى قالاعا شىققاندا جانە كەرى قايتقاندا تەك اينالما جولدارمەن قاتىناۋعا ءماجبۇر ەكەنى ايتىلعان بولاتىن.

وسى ماسەلەنى شەشۋ ءۇشىن «الماتى-بىشكەك» اۆتوجولىندا «قۇبىر» ۇلگىسىندەگى جولايرىق (18+700 شاقىرىم) جانە رايىمبەك اۋىلىنا بۇرىلىستاعى قوسىمشا جاياۋ جۇرگىنشىلەر كوپىرىن (19+860 شاقىرىم) سالۋ ءۇشىن جەكە جوبا («التىن-وردا» جوباسىنا كىرمەيتىن) ازىرلەندى. جولايرىقتىڭ جالپى ۇزىندىعى - 264 مەتر. «قازاۆتوجول» ۇلتتىق كومپانياسىنىڭ وكىلى ءلاززات ستامعازييەۆانىڭ سوزىنشە، قۇرىلىس جۇمىستارى 2023 جىلى اياقتالادى.