الەۋمەتتىك جەلىلەردە رەيستەردىڭ توقتاتىلۋىنا جانە كەشىكتىرىلۋىنە بايلانىستى ءوز جوسپارلارىن وزگەرتكەن جولاۋشىلار بيلەتتەرىنىڭ قۇنىن قايتارۋ بارىسىندا ادىلەتسىزدىكتىڭ ورىن العانى تۋرالى قاتە اقپار جاريالانىپ جاتىر، دەپ حابارلايدى Almaty-akshamy.kz.
بۇل تۋرالى ق ر كولىك مينيسترلىگىنىڭ فەيسبۋكتەگى پاراقشاسىندا حابارلانعان.
«اتالعان ماسەلە بىردەن ءارى تولىعىمەن جولاۋشىلار ءۇشىن وڭتايلى شەشىلگەن. قازاقستاننىڭ كولىك مينيسترلىگى اۆياكومپانيالارعا اۋا رايىنا بايلانىستى استانادان ۇشىپ كەتە الماعان جولاۋشىلارعا بيلەتتەر قۇنىن 100% قايتارۋدى تاپسىردى. بيلەتتى ارنايى قوسىمشالار ارقىلى قايتارۋ كەزىندە بەلگىلى ءبىر سوما ۇستالىپ قالادى دەپ شىعۋى مۇمكىن. ويتكەنى اۋە كومپانيالاردىڭ بيلەت ساتۋعا ارنالعان جۇيەلەرىنىڭ تەحنيكالىق باپتاۋلارى اۆتوماتتى تۇردە سولاي ەسەپتەيدى. سوندىقتان بيلەتتىڭ تولىق قۇنىن قايتارۋ ءۇشىن جولاۋشىلار اۆياكومپانيالارعا تىكەلەي جۇگىنۋى كەرەك. مۇنى ەكى ادىسپەن جۇزەگە اسىرۋعا بولادى: تەلەفوندارىنا حابارلاسىپ نەمەسە استانا اۋەجايى عيماراتىندا ورنالاسقان اۋە تاسىمالداۋشىلاردىڭ كەڭسەلەرىنە بارىپ، بيلەتتىڭ تولىق قۇنىن قايتارىپ الۋعا بولادى»، دەلىنگەن حابارلامادا.
باسپا ءسوز حاتشىسى بيلەتتىڭ اقشاسىن قايتارۋ كەزىندە بەلگىلى ءبىر سوما ۇستالىپ قالۋى مۇمكىن ەكەنىن ەسكەرە وتىرىپ، بيلەتتىڭ تولىق قۇنىن قايتارۋ ءۇشىن جولاۋشىلار ارنايى قوسىمشالار نە سايت ارقىلى ەمەس، اۆياكومپانيالارعا تىكەلەي جۇگىنۋى كەرەك ەكەنىن ەسكەرتتى.
ايتا كەتەرلىگى، كەشەدەن بەرى كولىك مينيسترلىگىنىڭ وكىلدەرى استانا اۋەجايىندا ءجۇر. مينيستر ءوز رەيستەرىن كۇتىپ وتىرعان جولاۋشىلارمەن سويلەسىپ، اۋا رايىنىڭ قولايسىزدىعىنان اۆياكولىككە قاتىستى قالىپتاسقان جاعدايدى رەتتەۋ ءۇشىن جەدەل شتاب قۇرۋ بويىنشا تاپسىرما بەرگەن بولاتىن.
كەشە اۋە كومپانيالارىمەن كەڭەس وتكىزىلىپ، جولاۋشىلاردى جونەلتۋگە جانە ۇشۋ كەستەسىن وڭتايلاندىرۋعا قاتىستى ءبىرقاتار شەشىم قابىلداندى. ناتيجەسىندە جاعداي وڭتايلى شەشىلىپ، اۋەجاي تۇننەن باستاپ كەلگەن ۇشاقتاردى قابىلداپ، قازىرگى تاڭدا قالىپتى رەجيمدە ۇشۋدى قامتاماسىز ەتۋدە.