ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك ەڭبەك ينسپەكسياسى كوميتەتىنىڭ ءتوراعاسى ەربولات ءابىلحاتين جاڭا جۇمىس كەستەسىنىڭ تيىمدىلىگى تۋرالى ساۋالعا جاۋاپ بەردى، - دەپ حابارلايدى اqshamnews.kz ءتىلشىسى Massaget.kz-كە سىلتەمە جاساپ.
"وتكەن ايدا ەڭبەك مينيسترلىگى جاڭا جۇمىس كەستەسىنە كوشتى: 08:00-دەن 17:30-عا دەيىن جۇمىس ىستەيدى. بۇل شارا قانشالىق ءتيىمدى بولدى، بۇرىنعىداي 09:00-دەن باستاپ جۇمىس ىستەيتىن باسقا ۆەدومستۆولارمەن ءوزارا ءىس-قيمىل كەزىندە قيىندىقتار تۋىندامادى ما؟ بۇل قىزمەتكەرلەردىڭ وزدەرىنە قالاي اسەر ەتتى، قيىندىقتار بولدى ما؟" دەگەن سۇراق قويىلدى.
كوميتەت باسشىسى بۇل وزگەرىس ەڭبەك مينيسترلىگىنىڭ جۇمىسىنا وڭ اسەرىن تيگىزگەنىن مالىمدەدى.
"تاڭەرتەڭ كەپتەلىسسىز جەتىپ الامىز، جۇمىستا سەگىزدە بولۋ ءۇشىن 07:30-دا شىعاسىڭ. كوشەلەر بوپ-بوس، بۇل جاعى دا وڭ اسەر ەتتى. جۇمىستان ساعات 17:30-دا شىعادى، ادامدار وتباسىنا كوڭىل بولە الادى، جەكە ىسىمەن اينالىسا الادى"، - دەدى ەربولات ءابىلحاتين.
شەنەۋنىكتىڭ ايتۋىنشا، باسقا مەملەكەتتىك ورگاندارمەن ءوزارا ءىس-قيمىل كەزىندە دە ماسەلەلەر تۋىنداماعان. ول استانا ءماسليحاتى ەلوردانىڭ باسقا مەكەمەلەرىنىڭ جۇمىس رەجيمىن اۋىستىرۋ ماسەلەسىن دە قاراستىرىپ جاتقانىن ەسكە سالدى.
"جۇمىس بەرۋشى ءوزىنىڭ ىڭعايىنا بايلانىستى كەستە جاسايدى. ەشقانداي قولايسىزدىق تۋىنداعان جوق، قىزمەتكەرلەردەن دە شاعىم تۇسپەدى، كەرىسىنشە ولار ەرتەرەك كەتكەنىنە قۋانادى"، - دەدى ول.
جۋرناليستەر قىركۇيەكتە ساباق باستالاتىنىن ەسكە سالىپ، بالالارى بار قىزمەتكەرلەر بۇل كەزدە نە ىستەيتىنىن سۇرادى.
كوميتەت ءتوراعاسىنىڭ ايتۋىنشا، بالالارىن مەكتەپكە جەتكىزىپ سالۋعا نەمەسە مەكتەپتەن الىپ كەتۋگە تۋرا كەلەتىن قازاقستاندىقتار جۇمىسقا ىڭعايلى ۋاقىتتا، مىسالى تاڭعى ساعات 9-10-دا كەلە الادى. ەڭ باستىسى ولار بەلگىلەنگەن 8 ساعات جۇمىس ىستەۋى قاجەت.