قازاقستان رەسپۋبليكاسىنىڭ شانحاي ىنتىماقتاستىق ۇيىمىنا ءتوراعالىق ەتۋى شەڭبەرىندە قورعانىس مينيسترلەرىنىڭ كەڭەسى ءوتتى.
وعان شىۇ-عا مۇشە مەملەكەتتەر قورعانىس ۆەدومستۆولارىنىڭ باسشىلارى، باس حاتشى، ۇيىمنىڭ وڭىرلىك تەرروريزمگە قارسى قۇرىلىمى اتقارۋشى كوميتەتىنىڭ ديرەكتورى، سونداي-اق بەلارۋس رەسپۋبليكاسىنىڭ قورعانىس ءمينيسترى قاتىستى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
ءداستۇرلى دوستىق پەن سىندارلى ءۇنقاتىسۋ تۇرىندە وتكەن كەڭەستە حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى تالقىلانىپ، قورعانىس ۆەدومستۆولارى اراسىنداعى ىنتىماقتاستىقتى دامىتۋ قادامدارى ايقىندالدى.
كەڭەستە شىۇ-نىڭ اسكەري-ساياسي بلوك ەمەستىگى، ال اسكەري سالاداعى ءوزارا ءىس-قيمىل باسقا ەلدەرگە قارسى باعىتتالماعانى اتاپ ءوتىلدى.
كەڭەس قىزمەتى اسكەري سالاداعى سەنىم شارالارىن نىعايتۋعا، وڭىرلىك قاۋىپسىزدىكتىڭ سىن-تەگەۋرىندەرى مەن قاتەرلەرىنە قارسى ءىس-قيمىل جونىندەگى كۇش-جىگەردى ۇيلەستىرۋگە باعىتتالعان. وسىعان بايلانىستى «بەيبىت ميسسيا» تەرروريزمگە قارسى بىرلەسكەن اسكەري وقۋ-جاتتىعۋلارىن وتكىزۋدى جالعاستىرۋ قاجەتتىگى اتاپ ءوتىلدى.
ۇيىمعا مۇشە مەملەكەتتەر قارۋلى كۇشتەرىنىڭ قىزمەتىن ناسيحاتتاۋ ماقساتىندا قورعانىس ۆەدومستۆولارىنىڭ باسشىلارى اسكەري-تاريحي مۇراجايلار اراسىنداعى ءوزارا ءىس-قيمىلدى دامىتۋعا كەلىستى.
قازاقستان قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ قاتىسۋشىلاردىڭ نازارىن ۇيىمنىڭ تاريحي اسپەكتىسىنە اۋداردى.
«ەگەر شىۇ-نىڭ باستاۋىنا قايتا ورالساق، ونىڭ نەگىزىن 1996 جىلعى 26 ساۋىردەگى شەكارا اۋدانىنداعى اسكەري سالاداعى سەنىمدى نىعايتۋ تۋرالى كەلىسىم (شانحاي كەلىسىمى) مەن 1997 جىلعى 24 ساۋىردەگى شەكارا اۋدانىنداعى قارۋلى كۇشتەردى ءوزارا قىسقارتۋ تۋرالى كەلىسىم (ماسكەۋ كەلىسىمى) قالاعانىن اتاپ وتكەن ءجون»، – دەدى ول.
سونىمەن بىرگە قازاقستان قورعانىس ءمينيسترى ۇيىم شەڭبەرىندە شىۇ-نىڭ بارلىق مەملەكەتتەرى ءۇشىن اسكەري بولىمدەرگە ەرىكتى نەگىزدە ءوزارا ساپار جاساۋ، وتكىزىلىپ جاتقان ءىرى اسكەري وقۋ-جاتتىعۋلار، قورعانىس ۆەدومستۆولارىنىڭ باسشىلىعى مەن قۇرىلىمى تۋرالى اقپارات بەرۋدى كوزدەي وتىرىپ، سەنىم شارالارى تۋرالى كەلىسىمدى ازىرلەۋدى جانە قابىلداۋدى ۇسىندى.
كەڭەس قورىتىندىسى بويىنشا حاتتاماعا، ىنتىماقتاستىقتى رەتتەيتىن ءبىرقاتار قۇجاتتارعا قول قويىلىپ، بىرلەسكەن كومميۋنيكە قابىلداندى.
ءىس-شارا سوڭىندا قازاقستاننىڭ قورعانىس ءمينيسترى مەن شانحاي ىنتىماقتاستىق ۇيىمىنىڭ باس حاتشىسى بىرلەسكەن مالىمدەمە جاسادى.