استانادا شەتەلدىكتى الداعان تاكسيست ۇستالدى

ول ءوز كىناسىن مويىنداپ، زالالدى تولىق كولەمدە وتەدى.

استانالىق تاكسيست ءۇندىستان ازاماتىن اۋەجيدان قوناقۇيگە 45 مىڭ تەڭگەگە اپارعان، دەپ حابارلايدى Almaty-akshamy.kz

22 قاراشادا 102 ارناسىنا "ديپلومات" قوناق ءۇيىنىڭ اكىمشىسىنەن حابارلاما كەلىپ ءتۇستى. ول تاكسي جۇرگىزۋشىسىنىڭ ءۇندىستان ازاماتىنان ونى استانا اۋەجايىنان قوناقۇيگە جەتكىزگەنى ءۇشىن 45 000 تەڭگە العانىن حابارلادى.

ىزدەۋ ءىس-شارالارىن وتكىزۋ بارىسىندا كولىكتەگى پوليسيا دەپارتامەنتىنىڭ قىزمەتكەرلەرى ەلوردالىق تاكسوپاركتەردىڭ ءبىرىنىڭ جۇرگىزۋشىسىن ۇستادى. ول شەتەلدىكتى الداپ، حالىقارالىق اۋەجايدان قوناقۇيگە دەيىنگى باعانى ادەيى كوتەرگەن.

تاكسي جۇرگىزۋشىسى ءوز كىناسىن مويىنداپ، زالالدى تولىق كولەمدە وتەدى.

قۇقىق بۇزۋشىعا قاتىستى اقبتك-نىڭ 190-بابى بويىنشا اكىمشىلىك حاتتاما تولتىرىلىپ (قازاقستان رەسپۋبليكاسىنىڭ تۇتىنۋشىلاردىڭ قۇقىقتارىن قورعاۋ تۋرالى زاڭناماسىن بۇزۋ)، 10 اەك مولشەرىندە ايىپپۇل سالىندى.

سونداي-اق تاكسوپاركتىڭ اتىنا وسىنداي قۇقىق بۇزۋشىلىقتاردىڭ سەبەپتەرى مەن جاعدايلارىن جويۋ تۋرالى ۇسىنىس جىبەرىلدى.