مەملەكەت باسشىسى قاسىم-جومارت توقايەۆتىڭ توراعالىعىمەن قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىنىڭ وتىرىسى وتۋدە.
پرەزيدەنت ەلىمىزدىڭ ءبىرقاتار وڭىرىندە سۋ تاسقىنى سالدارىنان قالىپتاسقان كۇردەلى جاعدايدى ەسكەرە وتىرىپ، بيىلعى سەسسيانى ونلاين-فورماتتا وتكىزۋ تۋرالى شەشىم قابىلداعان ەدى، دەپ حابارلايدى Almaty-akshamy.kz.
«بارشاڭىز كۋا بولىپ وتىرسىزدار، ءقازىر الەمدە ءتۇرلى تابيعات اپاتى كوبەيىپ بارادى. قازاقستان دا ۇلكەن قاتەرگە تاپ بولدى. ەلىمىزدىڭ كوپتەگەن ايماقتارىندا الاپات سۋ تاسقىنى بولىپ جاتىر. ءبىز ءۇشىن ەڭ باستى ماقسات – ازاماتتاردىڭ اماندىعى. سوعان ساي ۇكىمەت بارلىق قاجەتتى ىس-ارەكەتتەردى جاساپ جاتىر، ءتيىستى قاراجات ءبولىندى، ءىرى كومپانيالار مەن بيزنەس وكىلدەرى قول ۇشىن سوزىپ جاتىر. وسىعان دەيىن دە ايتتىم، جويقىن سۋ تاسقىنىنان بۇزىلعان ۇيلەردى قالپىنا كەلتىرۋ، زارداپ شەككەن تۇرعىنداردىڭ قالىپتى ومىرگە قايتا ورالۋىن قامتاماسىز ەتۋ – ءدال ءقازىر پرەزيدەنت رەتىندە مەنىڭ الدىمدا تۇرعان اسا ماڭىزدى مىندەت. سوندىقتان مەن ەلىمىزدە بۇرىن جوسپارلانعان حالىقارالىق ءىس-شارالاردى قىسقارتۋ تۋرالى ناقتى تاپسىرما بەردىم»، دەدى پرەزيدەنت جيىن بارىسىندا.
وسىعان بايلانىستى بيىل استانا حالىقارالىق فورۋمى وتپەيتىن بولدى.
«ارينە، بۇل – ەلىمىزگە قاجەت، وتە ماڭىزدى جيىن. دەگەنمەن ونى كەيىنگە قالدىرا تۇرۋعا بولادى. ال كەزەك كۇتتىرمەيتىن كەزدەسۋلەر مەن ءىس-شارالاردىڭ ءجونى بولەك. بۇل ەل يگىلىگى ءۇشىن كەرەك. اسسامبلەيا سەسسياسى جىل سايىن بىرلىك كۇنى قارساڭىندا وتەدى. ال بيىلعى باسقوسۋ مەملەكەتىمىز ءۇشىن كۇردەلى كەزەڭگە تۇسپا-تۇس كەلدى. شىن مانىندە، بۇل سەسسيانى ءدال وسى كەزدە وتكىزۋدىڭ ءمانى زور. بىرلىك پەن ىنتىماق – ەشقاشان ەسكىرمەيتىن قۇندىلىقتار. بۇعان وسى كۇندەردە كوزىمىز جەتتى دەۋگە بولادى»، دەدى قاسىم-جومارت توقايەۆ.