ءىس-شارا ەلىمىزدىڭ بارلىق وڭىرىنەن 200-دەن استام كاسىپكەر ايەلدەردىڭ باسىن بىرىكتىردى.
ءوز سوزىندە ۇلتتىق ەكونوميكا ۆيسە-مينيسترى باۋىرجان وماربەكوۆ اتاپ وتكەندەي، بۇگىندە مەملەكەت بيزنەستى، ونىڭ ىشىندە ايەلدەر كاسىپكەرلىگىن دامىتۋ ماقساتىندا اۋقىمدى مەملەكەتتىك قولداۋ شارالارىن قابىلداپ جاتىر. كاسىپكەر ايەلدەردى قولداۋ ءۇشىن قارجىلىق جانە قارجىلىق ەمەس شارالار ۇسىنىلادى، دەپ حابارلايدى اlmaty-akshamy.kz.
-2022 جىلدىڭ جانە بيىلعى جىلدىڭ 10 ايىنىڭ قورىتىندىسى بويىنشا كاسىپكەر ايەلدەردىڭ 638 ملرد. تەڭگەگە 17 مىڭعا جۋىق جوباسى سۋبسيديالاندى، 114 ملرد.تەڭگەگە 13 مىڭعا جۋىق جوبا كەپىلدەندىرىلدى. وسى كەزەڭدە 147 مىڭ كەڭەس بەرىلدى، - دەدى ول.
سونداي-اق، ەلىمىزدە ايەلدەر كاسىپكەرلىگىن دامىتۋ بويىنشا 20 ورتالىق جۇمىس ىستەيدى. بۇگىنگى تاڭدا 7 مىڭنان استام كەڭەستەر بەرىلىپ، ءتۇرلى قىزمەتتەر كورسەتىلدى.
وڭىرلەردە «ءبىر اۋىل - ءبىر ءونىم» جوباسى تابىستى ىسكە اسىرىلۋدا. ونىڭ ماقساتى – جەرگىلىكتى قوعامداستىقتىڭ الەۋەتىن دامىتۋ ءارى نىعايتۋ، سونداي-اق اۋىل تۇرعىندارىنىڭ ءال-اۋقاتىن ارتتىرۋ. قازىرگى تاڭدا جوبا نارىقتىق الەۋەتى بار وڭىرلەردەگى ەڭ پەرسپەكتيۆالى تاۋارلاردى انىقتاۋعا مۇمكىندىك تۋعىزدى. سونىمەن قاتار، «بيزنەستەگى ايەلدەر» باعدارلاماسى جۇزەگە اسىرىلۋدا.
جالپى، «تازا پاراقتان» رەتتەۋ ساياساتى جانە جاڭا سالىق كودەكسى بيزنەستى جۇرگىزۋ جاعدايلارىن جاقسارتۋعا، اكىمشىلىك جۇكتەمەنى ازايتۋعا باعىتتالعان.
-وسىلايشا، قولدانىستاعى ىنتالاندىرۋ شارالارىن ساقتاي وتىرىپ، بيزنەستى قولداۋدىڭ جاڭا باعىتتارىن ۇسىنامىز، - دەپ تۇيىندەدى ۆيسە-مينيستر.