استانادا كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوت وقۋشىنىڭ ومىرتقاسىن سىندىرىپ جىبەرگەن ءىس بويىنشا مورالدىق وتەماقى ءوندىرۋ تۋرالى ازاماتتىق داۋدى قارادى، دەپ حابارلايدى اqshamnews.kz ءتىلشىسى سوتقا سىلتەمە جاساپ.
سوت مالىمەتىنشە، ەلورداداعى مەكتەپتەردىڭ بىرىندە وقۋشىلار اراسىندا جانجال شىعىپ، سونىڭ سالدارىنان كامەلەتكە تولماعان ر. ەسىمدى وقۋشى سىنىپتاسىنا جاراقات سالعان. جابىرلەنۋشى قىزعا «ومىرتقانىڭ ىعىسۋسىز جابىق سىنۋى» دەگەن دياگنوز قويىلىپ، دەنساۋلىققا ورتاشا اۋىرلىقتاعى زيان كەلتىرۋ رەتىندە باعالانعان. پسيحولوگ قورىتىندىسىنا ساي، العان جاراقات فيزيكالىق شەكتەۋلەرمەن قاتار مورالدىق كۇيزەلىسكە دە اكەلگەن.
زارداپ شەككەن وقۋشىنىڭ اناسى سوتقا جۇگىنىپ، كىنالى بالانىڭ اناسىنان مورالدىق زيان كەلتىرگەنى ءۇشىن 1،5 ملن تەڭگە ءوندىرۋدى سۇرادى.
سوت وتىرىسىندا جاۋاپكەر كىنانى مويىنداپ، ۇلىنىڭ ارەكەتى ءۇشىن وكىنىش بىلدىرگەنىمەن، زارداپتىڭ اۋقىمىن «ونشا اۋىر ەمەس» دەپ باعالاپ، 100 مىڭ تەڭگە تولەۋدى ۇسىنعان. سونىمەن قاتار وتباسىنىڭ قارجىلىق مۇمكىندىگى شەكتەۋلى ەكەنىن العا تارتقان.
بارلىق دالەلدەمەلەردى زەردەلەگەن سوت مورالدىق وتەماقى مولشەرى اقىلعا قونىمدى ءارى ءادىل بولۋعا ءتيىس ەكەنىن اتاپ ءوتتى. ناتيجەسىندە:
-
كىنالى بالانىڭ 14 جاسقا تولماعانى؛
-
ارەكەتتىڭ قاساقانا ەمەس، ابايسىز سيپاتتا بولۋى؛
-
وتباسىنىڭ ماتەريالدىق جاعدايى؛
-
جابىرلەنۋشىنىڭ مورالدىق ازاپ شەككەنى، ءبىراق ونىڭ شامادان تىس دەڭگەيدە ەمەسى
ەسكەرىلىپ، تالاپ ارىز 300 مىڭ تەڭگە مولشەرىندە ءىشىنارا قاناعاتتاندىرىلدى.
سونىمەن بىرگە سوت جابىرلەنۋشى تاراپقا ەم-دومعا بايلانىستى قوسىمشا شىعىندار تۋىنداعان جاعدايدا، راستايتىن قۇجاتتار نەگىزىندە بۇل سومانى كەيىن بولەك تالاپ ەتۋگە قۇقىعى بار ەكەنىن ءتۇسىندىردى.
سوت شەشىمى زاڭدى كۇشىنە ەندى.