استانادا قازاقستان مۇسىلماندارى ءدىني باسقارماسى قازاقستان رەسپۋبليكاسىنىڭ ۇلتتىق مەرەكەسى – رەسپۋبليكا كۇنىنە وراي ۇيىمداستىرعان ءى حالىقارالىق قۇران جارىسى ءوز مارەسىنە جەتتى. جارىس جەڭىمپازدارىن ماراپاتتاۋ راسىمىنە باس ءمۇفتي ناۋرىزباي قاجى تاعان ۇلى ارنايى قاتىستى، دەپ حابارلايدى almaty-akshamy.kz
«اللانىڭ قالاۋىمەن، بارشاڭىزدىڭ جاناشىرلىقپەن جاساعان قولداۋلارىڭىزبەن قازاق ەلىندە تۇڭعىش رەت ۇلتتىق مەرەكەمىز – رەسپۋبليكا كۇنىنە وراي وتكەن ءى حالىقارالىق قۇران جارىسىن جوعارى دەڭگەيدە ۇيىمداستىردىق. اللاعا سانسىز شۇكىرلەر، ماقتاۋ مەن ماداقتار بولسىن.
قازاق حالقىندا «مىڭنان تۇلپار، جۇزدەن جۇيرىك شىعادى» دەگەن ناقىل ءسوز بار. مەنىڭ ويىمشا، سىزدەر الەمدەگى ەڭ ۇزدىك تاڭداۋلى قاريسىزدار. وسى رەتتە لايىقتى جۇلدەگە يە بولعان بارشا قاريلاردى قۇتتىقتايمىن. ءارقايسىڭىز ماراپاتقا لايىقسىزدار.
راسىندا، قاري ءۇش جاعدايدا، ياعني جاتتاعان قۇراندى ۇستازىنا تاپسىرۋ، تاراۋىق نامازىندا يمامدىق ەتۋ، وسىنداي جارىستارعا قاتىسۋ ارقىلى قۇرانىن پىسىقتاي تۇسەدى. سىزدەر ەكى كۇنگە سوزىلعان حالىقارالىق قۇران جارىسىندا اللانىڭ ءسوزىن تاعى دا پىسىقتاي ءتۇسىپ، جەڭىسكە جەتتىڭىزدەر. اللا تاعالا بارشامىزعا قۇران اياتتارىن تولىق جاتتاپ، وعان امال ەتۋدى جازعاي. قۇراننىڭ شاپاعاتىنا بولەنىپ، ەكى دۇنيە باقىتىنا كەنەلەيىك. ءامين» دەدى باس ءمۇفتي.
بۇدان كەيىن قمدب ءتوراعاسى ناۋرىزباي قاجى تاعان ۇلى ءى حالىقارالىق قۇران جارىسىنا قازىلىق جاساعان قاري-ۇستازدار – وسمان ساحين (تۇركيا)، جاحونگير نەماتوۆ (وزبەكستان)، ماحەر فاراماۋي (مىسىر اراب رەسپۋبليكاسى)، ابدۋللا ءالي ءالحاشمي (بىرىككەن اراب امىرىلىگى) جانە ءادىلقازىلار القاسىنىڭ ءتوراعاسى ەرسىن امىرەگە العىس حات تابىستادى.
ءى ورىن ($20 000) – يلياس حاجري (ماروككو كورولدىگى)
ءىى ورىن ($ 15 000) – تۋرپال-الي سادىكوۆ (رەسەي فەدەراسياسىنىڭ شەشەن رەسپۋبليكاسى)
ءىىى ورىن ($ 7 000) – مالەك ابدۋللا البادين (ليبيا مەملەكەتى)
ءىىى ورىن ($ 7 000) – ساعد ساليم (الجير حالىقتىق دەموكراتيالىق رەسپۋبليكاسى)
ءىV ورىن ($ 5 000) – ابدۋراحمان فاراج حافيز باراعي (مىسىر اراب رەسپۋبليكاسى)
V ورىن ($ 3 000) – مۇحاممەد اديب بەن احمەت رازاني (مالايزيا)
ايتا كەتەيىك، قۇران جارىسى ءمۇفتياتتىڭ ءتول «Munara TV» تەلەارناسىنان، «مۋفتيات قمدب» YouTube ارناسىنان، ءدىني باسقارمانىڭ @muftiyatkz رەسمي ينستاگرام-پاراقشاسىنان تىكەلەي ەفير ارقىلى كورسەتىلدى.