استانادا حالىقارالىق مەندەلەيەۆ وليمپياداسى باستالدى

قازاقستان نامىسىن 15 وقۋشى قورعايدى.

ەلوردادا مەكتەپ وقۋشىلارىنىڭ حيميا ءپانى بويىنشا حالىقارالىق 57ء-شى مەندەلەيەۆ وليمپياداسى باستالدى، دەپ حابارلايدى اlmaty-akshamy.kz وقۋ-اعارتۋ مينيسترلىگىنە سىلتەمە جاساپ. 

وليمپياداعا 20-دان استام ەلدىڭ وقۋشىلارى قاتىسادى. ونىڭ ىشىندە رەسەي، اۆستريا، ساۋد ارابياسى، ارمەنيا، يزرايل، وزبەكستان جانە باسقا دا مەملەكەتتەردىڭ قاتىسۋشىلارى بار. 

كوماندا قۇرامالارى بۇعان دەيىنگى ۇلتتىق حيميا وليمپيادالارىنىڭ ناتيجەسىندە انىقتالىپ، ىرىكتەلگەن. قازاقستان نامىسىن 15 وقۋشى قورعايدى.

«بالالار اراسىنداعى حيميادان حالىقارالىق مەندەلەيەۆ وليمپياداسى ءبىزدىڭ ەلىمىزدە وسىمەن ءتورتىنشى رەت وتكىزىلىپ جاتىر. بۇل جىلى نەگىزگى ءىس-شارالار استانادا وتەدى. اتاپ ايتقاندا، وقۋشىلار ءوز ءبىلىمىن تەحنيكالىق جابدىقتالۋى وليمپيادا تالاپتارىنا ساي كەلەتىن Nazarbayev University لابوراتوريالارى مەن اۋديتوريالارىندا سىنعا سالادى»- دەيدى «دارىن» ورتالىعىنىڭ ديرەكتورى گاجدەمبەك تۇرسىنوۆ.

وليمپيادا التى كۇنگە سوزىلادى جانە ءۇش كەزەڭنەن تۇرادى: ەكەۋى تەوريالىق جانە بىرەۋى پراكتيكالىق.

وليمپيادا ۇيىمداستىرۋشىلارى رەتىندە قابىلداۋشى تاراپتان قازاقستاننىڭ وقۋ-اعارتۋ مينيسترلىگى، رەسەي تاراپىنان م.ۆ.لومونوسوۆ اتىنداعى ءممۋ-نىڭ حيميا فاكۋلتەتى مەن اندرەي مەلنيچەنكو اتىنداعى قور.

وليمپيادا قورىتىندىسى بويىنشا قاتىسۋشىلارعا سەرتيفيكاتتار مەن ەستەلىك سىيلىقتار، جەڭىمپازدار مەن جۇلدەگەرلەرگە دارەجەلەرى بويىنشا ديپلومدار مەن مەدالدار تابىستالادى.

ءابسوليۋتتى جەڭىمپازعا جارىستى ۇيىمداستىرۋشىلار تاعايىنداعان اكادەميك ۆالەريي لۋنين اتىنداعى سىياقى تاپسىرىلادى. وليمپيادا 1-6 مامىر ارالىعىندا وتەدى.