ۇكىمەت باسشىسى ءاليحان سمايىلوۆ قازاقستان حالقىنىڭ بىرلىگى كۇنىمەن قۇتتىقتادى.
ق ر پرەمەر-مينيسترى ءاليحان سمايىلوۆ قازاقستان حالقىنىڭ بىرلىگى كۇنىمەن قۇتتىقتادى، دەپ حابارلايدى اlmaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
قۇرمەتتى وتانداستار!
سىزدەردى 1 مامىر – قازاقستان حالقىنىڭ بىرلىگى مەرەكەسىمەن شىن جۇرەكتەن قۇتتىقتايمىن!
بۇل كۇن – ورتاق كەلىسىم مەن اۋىزبىرشىلىكتى قاستەرلى قۇندىلىعى سانايتىن كوپۇلتتى حالقىمىز ءۇشىن ەڭسەلى ەلدىكتىڭ، ىرىستى ىنتىماقتىڭ مەيرامى.
تاۋەلسىز ەلىمىزدىڭ بولاشاعى ءوزارا سىيلاستىق جانە مىزعىماس دوستىق سياقتى مەملەكەتتىگىمىزدىڭ بەرىك نەگىزدەرىنە بايلانىستى.
سوندىقتان بۇگىنگى مەرەكە تۋعان جەرگە دەگەن شىنايى سۇيىسپەنشىلىگىمىز بەن شەكسىز قۇرمەتىمىزدىڭ ايشىقتى بەلگىسى بولىپ سانالادى.
ءاربىر ازاماتتىڭ كەلەشەك ۇرپاق الدىنداعى ۇلى مىندەتى – اتا-بابامىزدىڭ وسىناۋ باعا جەتپەس مۇراسىن كوزدىڭ قاراشىعىنداي ساقتاپ، ەل مۇددەسىنە قىزمەت ەتۋ.
بەرەكە-بىرلىكتىڭ ارقاسىندا ەلىمىزدە تۇراقتىلىق پەن ۇيلەسىمدىلىك سالتانات قۇرۋدا. مەملەكەت باسشىسى قاسىم-جومارت توقايەۆ ايقىنداپ بەرگەن ساياسي باعدار ەتنوسارالىق تاتۋلىق پەن ءدىنارالىق تۇسىنىستىكتى نىعايتۋعا باعىتتالعان.
بۇگىنگى شۋاقتى مەرەكەدە بارشاڭىزعا زور دەنساۋلىق، وتباسىلارىڭىزعا باقىت، ەڭبەكتەرىڭىزگە تولايىم تابىس تىلەيمىن!