قازاقستان پرەمەر-مينيسترى ولجاس بەكتەنوۆ ەلوردادا جەڭىل رەلستى كولىك (LRT) جەلىسىن سالۋ جوباسىنىڭ بارىسىن تەكسەردى، دەپ حابارلايدى aqshamnews.kz
استانا قالاسىنىڭ اكىمى جەڭىس قاسىمبەك نىساننىڭ دايىندىق دەڭگەيى مەن مەگاپوليستىڭ كولىك جۇيەسىن ودان ءارى دامىتۋ بولاشاعى تۋرالى باياندادى.
بۇگىنگى تاڭدا LRT ەستاكاداسىنىڭ ارقالىقتارىن توسەۋ كەزەڭى اياقتالدى. ستانسالاردىڭ نەگىزگى تەمىربەتون كونسترۋكسيالارىن سالۋ 2024 جىلدىڭ سوڭىنا دەيىن اياقتالادى دەپ جوسپارلانىپ وتىر. كەلەسى جىلى رەلستەردى توسەۋ، ستانسالاردى ارلەۋ، جىلجىمالى قۇرامداردى جەتكىزەتىن دەپو قۇرىلىسىن جۇرگىزۋ، سونداي-اق قابانباي باتىر داڭعىلى مەن قالداياقوۆ كوشەسىندەگى ەستاكادالىق بولىكتى اباتتاندىرۋ جۇمىستارى جۇرگىزىلەدى.
جەڭىل رەلستى جەلىنىڭ جالپى ۇزىندىعى 22،4 كم قۇرايدى. LRT قۇرامىنا 18 ستانسا كىرەدى. جوسپار بويىنشا، 652 ادام سىياتىن 19 جىلجىمالى قۇرام ىسكە قوسىلادى. قوزعالىس ارالىعى 4-5 مينۋتتى قۇرايدى. العاشقى كەزەڭدە تاۋلىگىنە 25 مىڭ ادام جولاۋشىلار اعىنى كۇتىلسە، ەڭ جوعارى ۋاقىتتا تاۋلىگىنە 92 مىڭ ادامعا دەيىن جەتۋى مۇمكىن. تولەم جۇيەسى قالالىق انالوگى بويىنشا، كولىك كارتاسىن ۆاليداسيالاۋ نەمەسە QR-كود ارقىلى تولەۋ ارقىلى جۇزەگە اسىرىلادى.
پرەمەر-مينيستر ستانسالار اۋماعىندا قۇرىلىس بارىسىندا قولدانىلاتىن تەحنولوگيالىق شەشىمدەرمەن تانىستى.
جوبانى ىسكە اسىرۋعا جوعارى ستاندارتتارىمەن تانىمال قىتايلىق جەتەكشى كومپانيالار، اتاپ ايتقاندا China Construction Sixth Bureau، Yunnan Construction and Investment Holding Group Co.، Longjian Road and Bridge Co.، Tianjin Rail Transit Group Co.، CRRC Tangshan Co LTD. تارتىلعان. سونداي-اق CRSC International، CASCO جانە HUAWEI Smart Transport BU كومپانيالارى كولىك جۇيەسىنىڭ ءقاۋىپسىز ءارى ءتيىمدى جۇمىسىن قامتاماسىز ەتۋدە ماڭىزدى ءرول اتقارىپ وتىر.
China Railway Asia-Europe Construction Investment قوسالقى مەردىگەر كومپانياسىنىڭ باس ديرەكتورى چجوۋ حايۆەي يننوۆاسيالىق تەحنولوگيالاردىڭ قولدانىلىپ جاتقانىن باياندادى. جوبا اياقتالعاننان كەيىن جەڭىل رەلستى جەلى بويىمەن جۇرگىزۋشىسىز پويىزدار ىسكە قوسىلادى.
«City Transportation Systems» ج ش س باسقارما ءتوراعاسى اسىلبەك دۇيسەبايەۆتىڭ ايتۋىنشا، بارلىق قۇرىلىس جۇمىستارىن اياقتاۋ جانە LRT-نى ىسكە قوسۋ 2025 جىلدىڭ سوڭىنا دەيىن جوسپارلانعان.
ولجاس بەكتەنوۆ جوبانىڭ ساپاسى مەن ىسكە اسىرىلۋ مەرزىمدەرىن باقىلاۋدى كۇشەيتۋ قاجەتتىگىن اتاپ ءوتتى.
«مەملەكەت باسشىسى ەلىمىزدىڭ كولىك جۇيەسىن دامىتۋعا ۇلكەن كوڭىل بولۋدە. LRT جوباسى بويىنشا ينفراقۇرىلىمدى دايىنداۋ ءۇشىن اۋقىمدى جۇمىس اتقارىلدى، قاراجات ءبولىندى. LRT قالا تۇرعىندارى مەن ەلوردا قوناقتارىنا قىزمەت ەتەدى. قۇرىلىس قارقىنى ارتىپ كەلەدى، ونى باسەڭدەتپەۋ ماڭىزدى. جوبا ەڭ جوعارى دەڭگەيدە جۇزەگە اسىرىلۋى ءتيىس. اكىمدىك پەن ورتالىق مەملەكەتتىك ورگاندار تاراپىنان باقىلاۋ كۇشەيتىلۋى قاجەت. ءبىز ناتيجەگە باعىتتالامىز»، — دەدى پرەمەر-مينيستر.