الماتى قالاسى وڭىرلىك كوممۋنيكاسيالار قىزمەتىندە وتكەن بريفينگتە پوليسيا دەپارتامەنتىنىڭ رەسمي وكىلى سالتانات ازىربەك جول-كولىك وقيعالارىنىڭ ستاتيستيكاسىن جاريالاپ، جولدارداعى قاۋىپسىزدىكتى ارتتىرۋعا باعىتتالعان شارالار تۋرالى ايتتى، دەپ حابارلايدى aqshamnews.kz
سپيكەردىڭ مالىمەتىنشە، 2024 جىلدىڭ باسىنان بەرى الماتىدا 3 869 جول-كولىك وقيعاسى (جكو) تىركەلىپ، سونىڭ سالدارىنان 4 211 ادام زارداپ شەككەن. اپاتتاردىڭ باستى سەبەبى قالانىڭ كولىك قوزعالىسىنىڭ قارقىندىلىعى: بۇگىنگى كۇنى الماتىدا 650 889 اۆتوموبيل تىركەلگەن، ال مەگاپوليسكە كۇن سايىن وڭىرلەردەن 550 000-عا دەيىن كولىك كىرەدى.
موپەدتەر مەن ەلەكتر سكۋتەرلەر سياقتى بالامالى كولىك تۇرلەرىنىڭ قاتىسۋىمەن جكو سانىنىڭ ارتۋى الاڭداتارلىق جايت.
پوليسيا مالىمەتىنشە:
- موپەدتەردىڭ قاتىسۋىمەن 743 جكو ورىن الىپ، 757 ادام جاراقاتتانىپ، 14 ادام قازا تاپتى.
- ەلەكتر سكۋتەرلەرىنىڭ قاتىسۋىمەن 103 جكو تىركەلىپ، 109 ادام جاراقات العان. قازا تاپقاندار جوق.
- موتوسيكلدەردىڭ قاتىسۋىمەن 19 اپات تىركەلىپ، 19 ادام جاراقاتتانىپ، 2 ادام قازا بولعان.
سالتانات ازىربەك موپەدشىلەر مەن سكۋتەرلەردى باقىلاۋدى كۇشەيتۋ ءۇشىن كۇندەلىكتى رەيد جۇرگىزەتىن 8 موتوسيكل ەكيپاجىنىڭ پاترۋلدىك قىزمەت اتقاراتىنىن اتاپ ءوتتى. جىل باسىنان بەرى 31 894 موپەد جۇرگىزۋشىسى جانە 28 762 سكۋتەر پايدالانۋشىسى اكىمشىلىك جاۋاپكەرشىلىككە تارتىلعان. سونىمەن قاتار، كامەلەتكە تولماعانداردى موپەد پەن سكۋتەر جۇرگىزۋگە رۇقسات ەتكەنى ءۇشىن 113 اتا-اناعا قاتىستى شارالار قابىلدانعان.
"جىل باسىنان بەرى الماتىدا 3 420 483 جول قوزعالىسى ەرەجەسى بۇزىلعان. ماس كۇيىندە كولىك باسقارعانى ءۇشىن 1 890 جۇرگىزۋشى ۇستالدى، 2 846 ادام جۇرگىزۋشى كۋالىگىنەن ايىرىلدى، ال 6 000-نان استام كولىك، ونىڭ ىشىندە 1 700 موپەد ارنايى تۇراققا قويىلدى"، — دەپ قورىتىندىلادى الماتى پد وكىلى.
ەستەرىڭىزگە سالا كەتەيىك، 3 قازاندا پرەزيدەنت قاسىم-جومارت توقايەۆ موپەد يەلەرىن جۇرگىزۋشى كۋالىگىن الۋعا جانە كولىكتەرىن تىركەۋگە مىندەتتەيتىن زاڭعا قول قويعان بولاتىن. بۇل شارالار جول قاۋىپسىزدىگىن ارتتىرۋعا جانە موپەدتەردىڭ قاتىسۋىمەن بولاتىن جكو سانىن ازايتۋعا باعىتتالعان.
موپەدتەردى تىركەۋ ءۇشىن كەلەسى قۇجاتتاردى ۇسىنۋ قاجەت:
- جەكە كۋالىك (نەمەسە سيفرلىق قۇجاتتار سەرۆيسى ارقىلى ەلەكتروندىق تۇردە)؛
- سالىق كودەكسىنىڭ 553 جانە 615-باپتارىنا سايكەس تىركەۋ الىمى مەن مەملەكەتتىك باج تولەنگەنىن راستايتىن قۇجاتتار؛
- موپەدتىڭ تەحنيكالىق قۇجاتى نەمەسە اشىق كوزدەردەن الىنعان تەحنيكالىق سيپاتتامالارى تۋرالى اقپارات؛
- مەنشىك يەسىنىڭ ءوتىنىشى؛
- كولىك قۇرالىن تەكسەرۋ اكتىسى.
ەگەر موپەد راماسىنىڭ ءنومىرى بولماسا، سايكەستەندىرۋ ءنومىرىن تىركەۋگە دەيىن ۋاكىلەتتى ورگان موپەد يەسىنىڭ ءوتىنىشى بويىنشا بەرەدى.