ەلوردالىق «استانا وپەرا» تەاترىنىڭ قورجىنى تاعى ءبىر بەدەلدى ماراپاتپەن تولىقتى.
تەاتر رەجيسسەرى ەرەنباق تويكەنوۆ ماسكەۋدە وتكەن حالىقارالىق «نانو-وپەرا» بايقاۋىندا جۇلدەلى ەكىنشى ورىنعا يە بولدى. بەلدى سايىستا جاس مامان قازىلارعا كاسىبي دايىندىقتىڭ جوعارى دەڭگەيىن جانە شىڭدالعان شەبەرلىگىن عانا ەمەس، سونداي-اق وتاندىق وپەرانىڭ رەجيسسۋرا سالاسىندا باسەكەگە قابىلەتتى ەكەنىن دە شەبەر كورسەتتى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
قازاقستاندىق قاتىسۋشىنىڭ تالانتى باسقا نوميناسيالاردا دا اتالعانىن ايتا كەتكەن ءجون. ناقتىلاساق، كورەرمەندەر كوزايىمى مەن «وپەرالىق رەجيسسۋرا ونەرىنە جاسامپاز كوزقاراسى ءۇشىن» سىيلىعىن الدى. بايقاۋ ءۇش كەزەڭنەن تۇردى. بىرىنشىسىندە ولار اريامەن، ەكىنشىسىندە دۋەتپەن، ۇشىنشىسىندە جاپپاي ساحنامەن جۇمىس ىستەدى. قازىلار القاسىنىڭ نازارىنا ەرەنباق تويكەنوۆ دجاكومو ءپۋچچينيدىڭ «تۋراندوت»، دجواككينو ءروسسينيدىڭ «سيەۆيلدىك شاشتاراز» جانە جورج بيزەنىڭ «كارمەن» وپەرالارىنىڭ ينتەرپرەتاسياسىن ۇسىندى.
"بۇل ءوز الدىنا ۇلكەن ءبىر تەست، ەمتيحان دەسەك بولادى. بىرىنشىدەن، رەجيسسەر ءۇشىن ترامپلين. وسىنداي بايقاۋلاردان كەيىن ۇسىنىستار كەلىپ تۇسەدى. ءقازىردىڭ وزىندە مەن باسقا تەاترلاردىڭ ۇسىنىستارىن ەستىپ جاتىرمىن. ءبىراق تەك ناقتىلانعان سوڭ بارىپ سىزدەرمەن بولىسەمىن. بۇل جەردە ەڭ ماڭىزدىسى دۇرىس سوزدەردى تاڭداۋ. سەبەبى ۋاقىت شەكتەۋلى، تەك 10 مينۋت بەرىلەدى، ال جاپپاي ساحناعا - 15 مينۋت. ەڭ قيىنى دا وسى، وسى ۋاقىت ىشىندە بارلىعىنا ۇلگەرۋ. ال قازىلارعا كەلەر بولساق، ولار - وتە تانىمال رەجيسسەرلەر، كوركەمدىك جەتەكشىلەر، بارلىعى دەرلىك حالىق ارتىستەرى. ءبىر سوزبەن ءوز سالاسىنىڭ مايتالماندارى"، - دەيدى «استانا وپەرا» تەاترىنىڭ رەجيسسەرى ەرەنباق تويكەنوۆ.