بالەت بيشىلەرى كلاسسيكا مەن زاماناۋي بيدەن كورەرمەندەرگە ونەرلەرىن پاش ەتتى
«استانا وپەرا» تەاترىنىڭ بالەت ترۋپپاسى اباي اتىنداعى قازاق ۇاوبت ساحناسىندا التىناي اسىلمۇراتوۆانىڭ اۆتورلىق باعدارلاماسىن ۇسىندى، دەپ حابارلايدى Almate-akshamy.kz
الماتىلىق تالعامپاز كورەرمەن العاشقى كۇنى «دون كيحوت» بالەتىنەن سىعان ءبيىن، Steppe Sons «قورقىت» مانەرلى شىعارماسىن، سونداي-اق ۇلتتىق تاقىرىپقا ارنالعان رينات گايسيننىڭ مۋزىكاسىنا جازىلعان «دالا ءۇنى» بالەتىن تاماشالادى.
ال كونسەرتتىڭ ەكىنشى بولىمىندە ەلوردالىق ارتىستەر رايموندو رەبەكتىڭ حورەوگرافياسىنداعى «قازىرگى ءسات قانشا ۋاقىتقا سوزىلادى؟» اتتى ءبىر ءبولىمدى بالەتىن ورىندادى. وسىلايشا الماتىلىق ونەرسۇيەر قاۋىم ەسكىرمەيتىن كلاسسيكا مەن جارقىن زاماناۋي حورەوگرافيا نومىرلەرىن باعالاي الدى.
«الماتى قالاسىنىڭ كورەرمەندەرىن قاتتى جاقسى كورەمىز، وتە ونەرسۇيەر قاۋىم. ونەردى باعالاي بىلەتىن، دەڭگەيىن اجىراتا بىلەتىن حالىق بولعاندىقتان جاڭالىقتارىمىزبەن بولىسەيىك، تەاترىمىزدىڭ دەڭگەيىن كورسەتەيىك دەپ وسى جاققا كەلىپ تۇرعان جايىمىز بار. دايىندىق جۇمىستارى كەرەمەت ءوتتى. ءبىز بۇل قالانىڭ كورەرمەندەرىن قاتتى سىيلايمىز. نۇر-سۇلتان قالاسىندا ەلوردالىق كورەرمەندەرىمىزگە بۇل قويىلىمدى ەكى رەت كورسەتتىك. دۇرىس ەمەس جەرلەرىن تازالاپ، تۇزەپ وسى جاققا جوعارعى دەڭگەيدە اكەلۋگە 2 اپتاداي ۋاقىت كەتتى»، - دەيدى «استانا وپەرا» تەاترىنىڭ جەتەكشى ءسوليسى باحتيار ادامجان.