قازگيدرومەت الماتى جانە تاعى بىرنەشە قالانىڭ تۇرعىندارىنا ەسكەرتۋ جاسادى، - دەپ حابارلايدى Massaget.kz ءتىلشىسى.
"16 شىلدەدە قاراعاندى، تەمىرتاۋ، وسكەمەن، اقتوبە، الماتى قالالارىندا، تۇندە اتىراۋ، قوستاناي جانە استانا قالالارىندا قولايسىز مەتەورولوگيالىق جاعدايعا بايلانىستى اۋا لاستانادى"، - دەپ جازىلعان حابارلامادا.
قولايسىز مەتەورولوگيالىق جاعداي - اۋانىڭ بەتكى قاباتىندا زيان زاتتار شوعىرلانۋىنا ىقپال ەتەتىن قىسقا مەرزىمدى مەتەوفاكتورلار (تىمىق اۋا رايى، جەل، تۇمان) جيىنتىعى.
ينۆەرسيا – بۇل اۋا رايىنداعى ەرەكشە قۇبىلىس: جىلى اۋا سۋىق اۋانىڭ ۇستىنە ورنالاسىپ، ونى “قاقپاق” سياقتى باسىپ قالادى. ادەتتە جەر بەتىنە جاقىن اۋا جىلى بولادى دا، جوعارى كوتەرىلىپ، لاستاۋشى زاتتاردى الىپ كەتەدى. ءبىراق ينۆەرسيا كەزىندە سۋىق اۋا تومەنگى قاباتتا قالىپ قويادى دا، بارلىق گاز، شاڭ مەن ءتۇتىن سول قاباتتا جينالادى. بۇل قۇبىلىس اسىرەسە ءىرى قالالاردا اۋا ساپاسىنىڭ ناشارلاۋىنا اكەلەدى.