استانالىق ۇجىم وزدەرىنىڭ ۇزدىك تۋىندىلارى مەن ايگىلى قويىلىمدارىن كورسەتەدى
27-30 قازاندا «استانا بالەت» تەاترىنىڭ دۋبايعا گاسترولى وتەدى، دەپ حابارلايدى Almaty-akshamy.kz. استانالىق ۇجىم شىعىستىڭ كوركىن اشا تۇسكەن ەكى كولەمدى قويىلىم – كوپشىلىككە تانىس «ماحاببات تۋرالى اڭىز» سپەكتاكلى مەن «بەيبارىس سۇلتان» بالەتىن ۇسىنباق.
«استانا بالەت» گاسترول شىمىلدىعىن زامانىمىزدىڭ زاڭعار حورەوگرافى يۋريي گريگوروۆيچتىڭ اريف مەليكوۆ مۋزىكاسىنا قويىلعان «ماحاببات تۋرالى اڭىز» سپەكتاكلىمەن اشادى. سپەكتاكل ەلۋ جىلدان استام ۋاقىت بۇرىن شىعارىلعانىمەن، سيۋجەت جەلىسى، اۋقىمدى دەكوراسيالارى مەن كوركەمدىك بيىگىمەن ءالى دە كورەرمەن قاۋىمدى تامساندىرىپ كەلەدى. مۇندا قۇشتارلىق پەن العاشقى بالعىن سەزىم، ماحاببات پەن بورىش سەزىمى اراسىنداعى كۇرەس سۋرەتتەلەدى. «ماحاببات تۋرالى اڭىز» - اسەم حورەوگرافيا مەن عاجايىپ دەكوراسيالار، اۋەزدى اۋەن مەن كونە پارسى اڭىزى ۇيلەسىم تاپقان تۋىندى.
گاسترولدىك ساپاردىڭ وزگە كۇندەرى تەاتردىڭ باس بالەتمەيستەرى، قازاقستاننىڭ ەڭبەك سىڭىرگەن قايراتكەرى مۋكارام اۆاحري قويعان «بەيبارىس سۇلتان» سپەكتاكلى كورسەتىلمەكشى. مۋزىكا اۆتورلارى – قازاقستاندىق كومپوزيتورلار حاميت شاڭعالييەۆ پەن اليبەك الپييەۆ. تاريحي تاقىرىپتاعى بالەت قويىلىمى تۋرالى يدەيانى «بالەت پەن ۇلتتىق ءبيدى قولداۋ جانە دامىتۋ قورى»، باس سەرىكتەسى «سامۇرىق-قازىنا» اق بىرلەسە وتىرىپ، جۇزەگە اسىردى.
بالەت بارىسىندا كورەرمەن قاۋىم وتكەن زامانعا شومىپ، بەيبارىس سۇلتاننىڭ عاجايىپ ومىرىنە قانىق بولادى. سپەكتاكل مازمۇنىن ويلاستىرعان كەزدە، حورەوگراف ادام بالاسىنىڭ جان سىرىنا بويلاپ، ايگىلى «جەڭىس اتاسى»، حIII عاسىرداعى تاياۋ شىعىستاعى ەڭ مىقتى مەملەكەتتىڭ امىرشىسىنە اينالعان قولباسشىنى قانداي ماسەلەلەر مازالاعانى جايلى وي وربىتكەندى قۇپ كوردى. بيلىك شىڭىنا جەتكىزگەن وسىنداي ءومىر بەلەستەرى ءسوز جوق، ۇلى ماقسات ءۇشىن الدەنەنى قۇربان ەتۋگە ءماجبۇر ەتەدى. قيىن تاعدىرىنا قاراماستان، بەيبارىس سۇلتان ءوزىنىڭ تۋعان جەرى – قىپشاق دالاسىنا دەگەن ىڭكار سەزىمىن جادىندا ساقتاپ، كوڭىلىنە مەدەۋ ەتتى. دالا سامالى، شىعىس اۋەزىنىڭ سارىنى مەن ايقاس ساحنالارىنىڭ رۋحتى اۋەندەرى كورەرمەن قاۋىمدى ساحناداعى قويىلىمنان كوز الماي، ءتۇرلى كۇي كەشىپ، الاي-دۇلەي سەزىمگە بولەيدى. بۇل قويىلىمدا سيۋجەت يىرىمدەرى، اۋەزدى اۋەن مەن ءتۇرلى سەزىم قاتپارلارى ۇيلەسىم تاپقان.
ءىس-شارا تاۋەلسىزدىكتىڭ 30 جىلدىعى اياسىندا، مادەنيەت جانە سپورت مينيسترلىگىنىڭ قولداۋىمەن وتەدى.