ورتالىق-وڭتۇستىك دالىزىنە جاتاتىن رەسپۋبليكالىق ماڭىزى بار استانا-الماتى كۇرە جولىنىڭ قۇرىلىسى اياقتالۋعا جاقىن.
قۇرىلىس جۇمىستارى اياسىندا قاراعاندى-بالقاش، بالقاش-بۇرىلبايتال، بۇرىلبايتال-كۇرتى جانە شامالعان ستانسياسىنىڭ اينالما جولى جوبالارى جۇزەگە اسىپ جاتىر. بۇل جولدىڭ جالپى ۇزىندىعى – 946 شاقىرىم، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
وتكەن اپتانىڭ سوڭىنان بەرى كولىك ءمينيسترى مارات قارابايەۆ قۇرىلىس جۇمىستارى ءجۇرىپ جاتقان جول ۋچاسكەلەرىنىڭ باسىندا. مينيستر قۇرىلىسقا جاۋاپتى مەردىگەر ۇيىمداردىڭ وكىلدەرىمەن دە كەزدەسۋدە.
استانا مەن الماتى اراسىنداعى جولدىڭ قۇرىلىس ساپاسىن كورەيالىق Dongsung Engineering جانە ISAN Corporation كومپانيالارى باقىلاۋعا الدى. كومپانيا ينجەنەرلەرى تەحنيكالىق قاداعالاۋدى جۇرگىزىپ، ۇنەمى قۇرىلىس باسىندا.
كولىك مينيسترلىگىنىڭ اۆتوموبيل جولدارى كوميتەتىندە اتاپ وتكەندەي، ۋچاسكەلەردىڭ ءبىر بولىگى جازدىڭ ورتاسىنان باستاپ قولدانىسقا بەرىلسە، قالعان بولىگى 2024 جىلدىڭ سوڭىنا دەيىن حالىق يگىلىگىنە تاپسىرىلادى.
ماسەلەن، جالپى ۇزىندىعى 363 شاقىرىمدى قۇرايتىن قاراعاندى-بالقاش كۇرە جولىنىڭ بويىندا اينالما جولدار مۇلدەم قالعان جوق. جوبا اياسىندا 11 كوپىر، اۋىل شارۋاشىلىعى تەحنيكاسىنىڭ ءوتۋى ءۇشىن ارنالعان 32 جول وتپەسى، كولىك ايرىعى جانە تەمىر جول ارقىلى وتەتىن جول وتپەسىنىڭ قۇرىلىسى تولىق اياقتالدى، ءقازىر اباتتاندىرۋ جۇمىستارى جۇرگىزىلۋدە. سونداي - اق، جولشىلار اسفالتتىڭ جوعارعى قاباتىن توسەپ، جول قوزعالىسى قاۋىپسىزدىگىن قامتاماسىز ەتۋ ءۇشىن ارنايى توسقاۋىل قورشاۋلارىن ورناتۋدا. نىساندى 2024 جىلدىڭ قازان ايىندا پايدالانۋعا بەرۋ كوزدەلىپ وتىر.
بىلتىر ماماندار بالقاش-بۇرىلبايتال كۇرە جولىنىڭ جالپى ۇزىندىعى 127 شاقىرىمدى قۇرايتىن 3 ۋچاسكەسىن پايدالانۋعا تاپسىردى. بيىل قالعان 3 ۋچاسكە قولدانىسقا بەرىلەدى.
جالپى ۇزىندىعى 81 شاقىرىمدى قۇرايتىن كۇرتى-بۇرىلبايتال جولى بيىل جازدا تاپسىرىلادى. ءقازىر ماماندار جول بويىندا اباتتاندىرۋ جۇمىستارىن جۇرگىزۋدە. سونىمەن قاتار بيىل جازدا شامالعان بەكەتىنىڭ اينالما جولى دا قولدانىسقا بەرىلمەك.
جوعارىدا اتالعان جول ۋچاسكەلەرى I-ب تەحنيكالىق ساناتىنا سايكەس ءتورت جولاقتى بولادى.