تاريح ساحناسىندا قانداي ەلدىڭ دە ەگەمەندى ەل بولۋى وڭاي دۇنيە بولماعان. ال ەگەمەندىگىن العان ەلدىڭ وسىپ-وركەندەپ، دامىعان ەل بولۋى وتە اۋىر ءۇردىس ەكەنىن جاقسى بىلەمىز. بۇل سول ەلدىڭ باسشىسىنا دا، حالقىنا دا ۇلكەن سىن بولادى.
قازاق حالقىنىڭ ەگەمەندى ەل بولعانىنا 30 جىل بولدى. بۇل تاريحي دامۋ تۇرعىسىنان الىپ قاراعاندا كوپ ۋاقىت ەمەس، ءبىراق ءححى عاسىردا، ءار كۇننىڭ سالماعى ەسەلەپ اۋىرلاپ تۇرعاندا، ۋاقىتپەن دۇرىس ساناسۋ كەرەك.
ءوزىنىڭ 30 جىلدىق ومىرىندە الدىمەن ەكونوميكالىق دامۋدى باستى ماقسات ەتىپ قويعان ەلگە ساياسي رەفورما اۋاداي قاجەت بولدى. مۇنى حالىق تا، مەملەكەت باسشىسى دا جاقسى سەزىندى، جاقسى ءتۇسىندى. قاسىم-جومارت توقايەۆ ءوزى ايتقانداي، ۇزاققا قالدىرماي، الەمدە بولىپ جاتقان اسا كۇردەلى جاعدايلاردى ەسكەرە وتىرىپ، ەلىمىزدە ساياسي رەفورما جاساۋ جونىندەگى ءوز ويىن حالىققا جاريا ەتتى. حالىق بولسا، تاپجىلماي وتىرىپ مۇقيات تىڭدادى، تىڭدادى دا يىعىنان اۋىر جۇك تۇسكەندەي، تولعانىستى ريزاشىلىق سەزىممەن قابىل الدى دەپ ويلايمىن.
جولداۋدا ايتىلعان، ساياسي رەفورما جاساۋدىڭ 10 باعىتىن دا تولىق قولدايمىن. پرەزيدەنت ايتقانداي، جولداۋدىڭ ءار باعىتى كوپ تەبىرەنىپ، كوپ تولعانىپ، تەرەڭ ويلانىستان تۋعان شەشىمدەر ەكەنى بايقالادى. ءار باعىتتىڭ استارى تىم تەرەڭدە جاتىر، ولار قالتقىسىز ءتۇسىنىپ، ەل بولىپ جۇمىلا وتىرىپ قىرۋار ءىس تىندىرۋدى قاجەت ەتەدى. ءبىز، بۇل ارادا، وسىنداي ساياسي رەفورما جاساۋدا كەشىگىڭكىرەپ قالعانىمىزدى دا ەسكەرۋىمىز قاجەت. ولاي بولسا، ەندى ۋاقىتتان ۇتىلۋعا بولمايدى.
مەن، بۇدان 30 جىل بۇرىن مەملەكەتتىك دەڭگەيدە ءبىلىم سالاسىندا رەفورما جاساۋعا تىكەلەي قاتىسقان جانمىن. 1992 جانە 1996 جىلدارى دايىندالعان، ەلىمىزدىڭ ءبىلىم بەرۋدى دامىتۋ باعدارلامالارىن جاساۋ ءۇشىن قۇرىلعان ۋاقىتشا جۇمىس توبىنا باسشىلىق جاسادىم. سودان بەرى وسى سالانى دامىتۋ پروبلەمالارىمەن عىلىمي ءارى پراكتيكالىق تۇرعىدا ۇزبەي شۇعىلدانىپ كەلەمىن. بۇل باعىتتا وقىعان-توقىعانىم، كوڭىلگە تۇيگەندەرىم، اتقارعان ىستەرىم، الەمدىك دەڭگەيدە مويىندالعان عىلىمي وي-تۇجىرىمدارىم بار، ياعني ەلىمىزدىڭ ءبىلىم بەرۋ ساياساتىن جەتىلدىرۋگە قاتىستى وزىندىك وي قالىپتاستىرعان جانمىن.
جاس ۇرپاققا سانالى تاربيە، ساپالى ءبىلىم كەز ەلدىڭ وسىپ-وركەندەۋىنىڭ ءتۇپ قازىعى بولاتىن بولسا، وسى باعىتتا ۇكىمەتتىك ەمەس ۇيىم – پەداگوگيكالىق عىلىمدار اكادەمياسىنىڭ مۇشەلەرى مەملەكەت باسشىسى قاسىم-جومارت كەمەل ۇلى توقايەۆتى تولىق قولداپ، ءارقايسىمىز وسى رەفورمانى ىسكە اسىرۋ ماقساتىندا تياناقتى ىستەر اتقاراتىن بولامىز.