الەۋمەتتىك ماسەلەلەردى شەشۋمەن قاتار ساياسي سۇرانىستى قاناعاتتاندىرۋ كەزەك كۇتتىرمەس ماڭىزدى سۇراق ەكەنى بەلگىلى، ويتكەنى ول – قوعامدى جاڭارتۋدىڭ بىردەن-بىر جولى.
پرەزيدەنت ق.توقايەۆتىڭ الدىندا باسى ەپيدەميادان باستالىپ، سوڭى قاڭتارداعى قاقتىعىستار مەن ۋشىققان گەوساياسي كيكىلجىڭدەر سالدارىنان ابىرجىپ قالعان قوعامدى ەكونوميكالىق داعدارىستان امان الىپ شىعۋ، جۇزدەگەن ەتنوس، ءدىني كونفەسسيا وكىلدەرىنەن قۇرالعان حالىقتىڭ باسىن بىرىكتىرە وتىرىپ، مەملەكەتتىڭ ىشكى ساياسي تۇراقتىلىعىن قالىپتاستىرۋ، الماعايىپ زاماندا سىرتقى ساياسي باعىت-باعداردى اسقان بايىپتىلىقپەن ابايلاپ انىقتاۋ مىندەتى تۇر.
تاۋەلسىزدىكتىڭ باستاپقى جىلدارى ومىرشەڭ ەكەندىگى راستالعان «اۋەلى – ەكونوميكا، ال سونان سوڭ – ساياسات» تاكتيكاسىنان ءسوز جۇزىندەگى ەمەس، ءىس جۇزىندەگى ناقتى ساياسي رەفورمالار ستراتەگياسىنا قادام باسۋ – وتە ماڭىزدى شەشىم. سونىڭ كورىنىسى رەتىندەگى سۋپەرپرەزيدەنتتىك باسقارۋ فورماسىنان پارلامەنتى مىقتى پرەزيدەنتتىك رەسپۋبليكا تاسىلىنە تۇبەگەيلى ءوتۋ، «مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن ءىس جۇزىندە ورىنداۋ، پروپورسيونالدى جانە ماجوريتارلى ارالاس سايلاۋ جۇيەسىن ەنگىزۋ، ساياسي پارتيالاردى تىركەۋ پروسەدۋراسىن جەڭىلدەتۋ ءارى مۇمكىندىكتەرىن كەڭەيتۋ جانە ت.ب.
اسىرەسە، پرەزيدەنتتىك وكىلەتتىلىككە شامادان تىس ۇستەمدىك بەرۋدەن باس تارتۋ جولىندا پرەزيدەنتتىڭ جاقىن تۋىستارىنىڭ ساياسي مەملەكەتتىك قىزمەت اتقارۋىنا، كۆازيمەملەكەتتىك سەكتور باسشىسى بولۋىنا تىيىم سالۋ؛ پرەزيدەنتتىك وكىلەتتىلىگىن اتقارۋ كەزىندە ساياسي پارتياعا مۇشەلىكتى توقتاتۋ؛ مەملەكەت باسشىسىنىڭ وبلىس، رەسپۋبليكالىق ماڭىزى بار قالا جانە استانا اكىمدەرى اكتىلەرىنىڭ كۇشىن جويۋ نەمەسە توقتاتا تۇرۋ جونىندەگى قۇزىرەتىن الىپ تاستاۋ؛ اۋدان، قالا، اۋىلدىق وكرۋگ اكىمدەرىن قىزمەتىنەن الۋ قۇقىن جويۋ، ت.س.س. تولعاۋى جەتكەن شەشىمدەر جولداۋدا كوپتەپ كەلتىرىلگەن.
پرەزيدەنت ىشكى ساياسات ماسەلەسىنە، الەۋمەتتىك كوڭىل كۇيگە، ەلدى بىرىكتىرۋشى مۇراتتارعا ءجىتى نازار اۋدارىلاتىندىعىن بايقاتىپ وتىر. تاۋەلسىزدىكتى نىعايتا ءتۇسۋدىڭ باستى شارتتارىنىڭ ءبىرى – ادامداردىڭ بويىندا ەلىمىزدىڭ تىرشىلىگىن باياندى ەتەتىن ۇلتتىق كەلىسىم رۋحىن جانە وتانسۇيگىشتىك سەزىمىن نىعايتۋ. نەگىزى، مەن وسى جولداۋدى اتا بۋىننىڭ تاۋەلسىزدىك سىندى اسقاق ارمانىن جۇزەگە اسىرعان بۇگىنگى اعا بۋىن وكىلدەرىنىڭ بولاشاقتى نوقتالايتىن جاستارعا دەگەن ساياسي اماناتى دەپ قابىلدادىم.