اسقار مامينگە دەنساۋلىق ساقتاۋ ينفراقۇرىلىمىن دامىتۋ تۋرالى باياندالدى
ق ر پرەمەر-مينيسترى اسقار مامين «استانا مەديسينا ۋنيۆەرسيتەتى» كەاق جانىنداعى بىرىككەن ۋنيۆەرسيتەت اۋرۋحاناسىنىڭ قۇرىلىس الاڭىنا باردى. دەنساۋلىق ساقتاۋ ينفراقۇرىلىمىن دامىتۋدىڭ جاڭا ستاندارتتارىن ەنگىزۋ ماسەلەلەرى قارالدى، ولاردى مەملەكەتتىك-جەكە مەنشىك ارىپتەستىك اياسىندا ەلىمىزدە 20 ءىرى كوپبەيىندى اۋرۋحانا سالۋ ارقىلى ىسكە اسىرۋ جوسپارلانىپ وتىر، دەپ حابارلادى Almaty-akshamy. kz. ق ر پرەمەر-مينيستردىڭ سايتىندا جاريالانعان حابارعا سىلتەمە جاساپ.
ولاردىڭ ىشىندە 4 كلينيكا ەلىمىزدىڭ جەتەكشى مەديسينالىق ۋنيۆەرسيتەتتەرىنىڭ جانىنان سالىناتىن بولادى، بۇل عىلىمدى، ءبىلىم بەرۋدى جانە ەمدەۋ پروسەسىن كەشەندى تۇردە دامىتۋعا، كلينيكالىق زەرتتەۋلەردىڭ تيىمدىلىگىن ارتتىرۋعا مۇمكىندىك بەرەدى. وسىنداي زاماناۋي مەكەمەلەردىڭ ءبىرى «استانا مەديسينا ۋنيۆەرسيتەتى» كەاق جانىنداعى بىرىككەن ۋنيۆەرسيتەت اۋرۋحاناسى بولادى. مەديسينالىق ورتالىق JCI حالىقارالىق ستاندارتتارىنا ساي، 800 توسەكتىك تاۋلىكتىك ستاسيوناردى، كۇندىزگى ستاسيوناردى، كونسۋلتاسيالىق-دياگنوستيكالىق كەشەندى، عىلىمي-زەرتتەۋ جانە كلينيكالىق زەرتحانالاردى، اۋديتوريالار مەن وقۋ سىنىپتارىن قامتيتىن بولادى. جوبانى 2023 جىلدىڭ ءى توقسانىندا ىسكە اسىرۋ كوزدەلگەن.
«حالىقارالىق ستاندارتتارعا ساي كەلەتىن زاماناۋي مەديسينالىق ينفراقۇرىلىمنىڭ بولۋى ەلىمىزدىڭ بۇكىل دەنساۋلىق ساقتاۋ جۇيەسىن ودان ءارى دامىتۋ ءۇشىن تۇبەگەيلى مانگە يە. الدىمىزدا دەنساۋلىق ساقتاۋ ينفراقۇرىلىمىن جانە مەديسينا قىزمەتكەرلەرىنىڭ بىلىكتىلىگىن جاڭعىرتۋ بويىنشا اۋقىمدى مىندەتتەر تۇر، بۇل حالىققا مەديسينالىق قىزمەتتەردى ساپالى جاڭا دەڭگەيدە كورسەتۋگە جول اشادى»، — دەدى اسقار مامين بولاشاق مەديسينا ورتالىقتارىنىڭ شوۋ-رۋمىن تەكسەرۋ كەزىندە.
ينسپەكسيالىق ساپارعا پرەمەر-مينيستردىڭ ورىنباسارلارى رومان سكليار مەن ەرالى توعجانوۆ، نۇر-سۇلتان قالاسىنىڭ اكىمى التاي كولگىنوۆ، دەنساۋلىق ساقتاۋ ءمينيسترى الەكسەي سوي، يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قاتىستى.