سانيتاريالىق رەجيمدى بۇزۋعا جول بەرگەندەرگە قاتاڭ شارا قولدانۋ كەرەك بۇل تۋرالى ۇكىمەت وتىرىسىندا ق ر پرەمەر-مينيسترى اسقار مامين ايتتى، دەپ حابارلايدى almaty-akshamy.kz
«جالپى ەپيدەميولوگيالىق جاعداي تۇراقتى بولىپ تۇر. ينفەكسيالىق اۋرۋحانالارداعى ورىنداردىڭ جۇكتەمەسى 30 پايىز، ال رەانيماسيالىق ورىنداردىڭ جۇكتەمەسى 26 پايىزدى قۇراپ وتىر. دەگەنمەن، بۇل اۋرۋدىڭ ەۋروپانىڭ ءبىرقاتار ەلدەرىندە جانە دە شەكارالاس ەلدەردە وسكەنىن ەسكەرسەك، سانيتاريالىق تالاپ ءىس-شارالارى جاپپاي ساقتالۋعا ءتيىس. بارلىق وڭىرلەردە اكىمدىكتەر سانيتاريالىق تالاپتاردىڭ ساقتالۋىن باقىلايتىن مونيتورينگ توپتارىنىڭ جۇمىسى مەن تيىمدىلىگىن كۇشەيتسىن. سانيتاريالىق رەجيمدى بۇزۋعا جول بەرگەندەرگە قاتاڭ شارا قولدانۋ كەرەك»، - دەدى ۇكىمەت باسشىسى.
ونىڭ دەرەگىنشە، قازىرگى ۋاقىتتا 8،5 ملن-نان استام ادام ءبىرىنشى كومپونەنتتى، 7،7 ملن ادام ەكىنشى كومپونەنتتى سالدىردى. ال 22 قاراشادان باستاپ ريەۆاكسيناسيالاۋ باستالادى.
«وسىعان بايلانىستى ەگۋ پۋنكتتەرىنىڭ، مەديسينا ۇيىمدارى مەن مەديسينا جۇمىسكەرلەرىنىڭ ازىرلىگىن قامتاماسىز ەتۋ قاجەت»، - دەگەن اسقار مامين جالپى باقىلاۋدى ورىنباسارى ەرالى توعجانوۆقا جۇكتەدى.